प्रस, परवानीपुर, २४ भदौ/
वीरगंजका बस तथा सुमो व्यवसायीहरू कोरोना महामारीका कारण पछिल्लो ६ महीनामा बर्बाद भएका छन्। यातायात व्यवसायीहरूले ६ महीनादेखि गाडी नचल्दा सवारीसाधन बिग्रिन थालेको, बैंकको ऋण तिर्न नसकेको, कर्मचारीको तलब तथा बस काउन्टरको भाडाको चिन्ताले पिरोलेको बताएका छन्।
वीरगंजबाट छोटो र लामो दूरीमा चल्ने सबै सवारीसाधनका धनी, कर्मचारीहरू अब भोकमरीले मर्ने उनीहरूको भनाइ छ। पर्सा नारायणी यातायात प्रालिका अध्यक्ष जगतसाह कानूका अनुसार विगत ६ महीनामा यहाँका व्यवसायीहरूलाई ७५ करोड रुपैयाँभन्दा बढीको घाटा लागिसकेको र यातायात व्यवसायसँग जोडिएका हजारौं परिवार प्रभावित भएका छन्।
“वीरगंजबाट करीब ६ सय बस र सुमो चल्ने गर्छन्, एक दिनमा एउटा गाडीको औसत ७ हजार आम्दानीको हिसाब निकाल्ने हो भने एक दिनको ४२ लाख आम्दानी हुन आउँछ,” उनले भने, “त्यसैगरी, मासिक १२ करोड ६० लाख मासिक नोक्सान भएको छ भने ६ महीनामा करीब रु ७५ करोड ६० लाख घाटा लागेको छ।”
वीरगंजबाट छोटो दूरीमा वीरगंज–पथलैया, वीरगंज– कलैया, वीरगंज–पोखरियालगायतका ठाउँमा ३ सयवटा मिनीबस चल्छन् भने वीरगंज–काठमाडौं दैनिक ८५ वटा सुमो चल्ने गरेको छ। त्यसैगरी, वीरगंजबाट दैनिक हेटौंडा, रौतहट, जनकपुर, मोरङ, मेची, भरतपुर, बुटवल, भैरहवा, नेपालगंज, सुर्खेत, धनगढीलगायत क्षेत्रमा १५० वटा बस चल्ने गरेका थिए।
त्यसैगरी, वीरगंजबाट काठमाडौं दैनिक डेढ सयभन्दा बढी रात्रिबस चल्ने गरेका थिए। नेपाल सरकारले कोरोना महामारीको कारण देशव्यापी लगाएको लकडाउन र पर्सा–बारामा पनि कोरोना समुदायस्तरमा फैलिएपछि करीब दुई महीना पुग्न लागेको निषेधाज्ञाले यातायात व्यवसाय पूर्णरूपमा ध्वस्त भएको व्यवसायीहरूको भनाइ छ।
वीरगंजको बसपार्कमा अहिले करीब ४ सय बस र सुमो पार्क गरी लामो समयदेखि राख्दा ती गाडीहरूको मेशिन तथा बडीमा खिया लाग्न थालेको व्यवसायीहरूले बताएका छन्।
“बैंकबाट सधैं ऋणको किस्ता र ब्याजको लागि फोनमार्फत् ताकेता भइरहेको छ, यता गाडीको टायर खराब भइसक्यो,” पर्सा नारायणी यातायात प्रालिका अध्यक्ष कानूले भने, “अब गाडी खोलिएन भने धेरैजना यो व्यवसायबाट कङ्गाल भएर विस्थापित हुने अवस्था आउँछ।” उनले अहिले पनि गाडी खोले गाडीको सर्भिसिङ गर्नुपर्ने, मोबिल फेर्नुपर्ने, क्राउन आयल, आयलसिल, हब ग्रीज गराउनुपर्ने जस्ता काम गर्नुपर्ने हुँदा एउटा गाडीमा कम्तीमा न्यूनतम ५० हजार रुपैयाँ खर्च लाग्ने बताए।
व्यवसायीहरूले अब पनि सरकारले यातायात व्यवसायीको पीडा सुनेन भने यातायात महासङ्घ र यातायात व्यवस्था कार्यालयमा साँचो बुझाएर आन्दोलनमा उत्रिने वीरगंजका व्यवसायीहरूले चेतावनी दिएका छन्।
