चिरञ्जीवी सापकोटा, ठोरी, १७ भदौ/
ठोरीमा जारी तीज कप नकआउट फूटबल प्रतियोगिता अनिश्चितकालको लागि स्थगित गरिएको छ।
निर्मल समाज युवा क्लब, ठोरी–४ र वनशक्ति युवा क्लब, ठोरी–२ बीच भएको फाइनल खेल मध्यान्तरपूर्व नै विवाद उत्पन्न भएपछि हाललाई स्थगित गरिएको आयोजक समितिका अध्यक्ष जगेन्द्र पौडेलले जानकारी दिए।
दुवै टीमबाट एक/एक गोल भए तापनि वनशक्ति युवा क्लबका खेलाडीलाई रेफ्रीले रेडकार्ड दिएपछि विवाद उत्पन्न भएको र झन्डै एक घण्टासम्म पनि विवाद नसल्टेपछि आयोजकले बाध्य भएर खेल स्थगित गर्नुपरेको अध्यक्ष पौडेलले जानकारी दिए। आयोजकले खेल स्थगित गरेपछि आक्रोशित समूहले स्टेजमा राखिएका कुर्सी, टेबल तोडफोड गरेका थिए। आक्रोशित भीडलाई नियन्त्रण गर्न नेपाल प्रहरी र सशस्त्र प्रहरीलाई हम्मेहम्मे परेको थियो।
