प्रस, पोखरिया, १६ असोज/
पर्सा जिल्लाका दुई स्थानमा शनिवार भएको रक्तदान कार्यक्रममा चारजना महिलासहित ६८ जनाले रक्तदान गरेको छन् ।
दुर्गा पूजा समिति रानीघाटले आयोजना गरेको रक्तदान कार्यक्रममा दुईजना महिलासहित ४६ जनाले रक्तदान गरेका थिए । समितिका अध्यक्ष सतीश सिंह राजपूतले रक्तदान कार्यक्रमको शुभारम्भ गरेको रक्तसञ्चार केन्द्र वीरगंजका प्राविधिक प्रमुख सौरभराज पाण्डेले बताए ।
यसैगरी, टैरिमाई युवा क्लब पोखरिया–८ जगतपुर–जननपुरले अन्तर्राष्ट्रिय अहिंसा दिवसको अवसरमा आयोजना गरेको रक्तदान कार्यक्रममा दुईजना महिलासहित २२ जनाले रक्तदान गरेको रक्त सञ्चार केन्द्र वीरगंजकी प्राविधिक डिल्लीमाया घिमिरेले बताइन् । चन्द पटेल, प्रेमचन्द मुखिया, रामप्रवेश सहनी, सहिला खातुन र हरिप्रसाद साहलगायतले रक्तदान गरेका थिए ।
कार्यक्रमको उद्घाटन सत्रमा प्रदेशसभा सदस्य प्रह्लाद गिरी, नगरप्रमुख दीपनारायण रौनियार, उपप्रमुख सलमा खातुन, संविधानसभा सदस्य रामेश्वर रौनियार, लोकतान्त्रिक समाजवादी पार्टीका नेता निजामुद्दीन समानी, वडाध्यक्ष किशोरी साहलगायतले मन्तव्य व्यक्त गरेका थिए । कार्यक्रमको सहजीकरण शैलेश साहले गरेका थिए ।
