कास्की, २७ वैशाख/रासस
कोरोना सङ्क्रमण बढ्दै जाँदा अस्पतालहरूमा अत्यावश्यक अक्सिजनको अभाव हुन थालेपछि पोखरामा ‘अक्सिजन बैंक’ स्थापना गरिएको छ। यहाँ क्रियाशील विभिन्न सात रोटरी क्लबले गण्डकी अटो मेकानिकल वर्कसप एसोसिएशनसँग सहकार्य गरेर अक्सिजन बैंक (जीवन आशा) स्थापना गरेका हुन्।
अक्सिजन अभावमा कोही पनि बिरामी उपचारबाट वञ्चित हुन नपरोस् भनेर पछि फिर्ता गर्ने शर्तमा ग्याँस सिलिन्डर सङ्कलन गर्ने र आवश्यक क्षेत्रमा तत्कालै पुु–याउने गरी बैंक स्थापना गरिएको कार्यक्रम संयोजक मीनु कुँवर श्रेष्ठले बताए।
अटो मेकानिकल वर्कसपहरूमा दुई हजार हाराहारीमा अक्सिजन सिलिन्डर रहेकाले ती सिलिन्डर अक्सिजन ग्याँस उद्योगमा लगेर भरिने र आवश्यकताका आधारमा अस्पतालहरूमा उपलब्ध गराउने गरी अक्सिजन बैंक स्थापना गरिएको बताइएको छ।
कार्यक्रममा प्रचार संयोजक अर्जुन खनालले आपत्कालीन अवस्थामा कसैलाई पनि अनावश्यक अक्सिजन ग्याँस सिलिन्डर भण्डारण नगर्न आग्रह गर्दै अक्सिजन सिलिन्डर उपलब्ध गराएर अभियानमा साथ दिन आग्रह गरेका छन्।
उनले भने–“अक्सिजनको अभावमा कोरोनाका गम्भीर बिरामीले मृत्युवरण गर्न नपरोस् भनेर लागिपरेका छौं। कोही कसैसँग अक्सिजन ग्याँस सिलिन्डर छ भने हामीलाई उपलब्ध गराएर जीवन बचाउने अभियानमा साथ दिन अपिल गरेका छौं।”
रोटरी क्लब अफ पोखरा, रोटरी क्लब अफ लेकसाइड, रोटरी क्लब अफ न्यूरोड, रोटरी क्लब अफ अन्नपूर्ण, रोटरी क्लब अफ फिस्टेल, रोटरी क्लब अफ मिड टाउन र रोटरी क्लब अफ पोखरा लेखनाथले अक्सिजन बैंक स्थापना गर्ने अभियान शुरू गरेका हुन्। गण्डकी प्रदेशको राजधानी शहरसमेत रहेको पोखराका अस्पतालहरूमा पछिल्लो समय अक्सिजनको माग बढ्दो छ। अक्सिजन प्लान्ट रहे पनि सिलिन्डर अभाव भएपछि स्थानीय प्रशासन, प्रहरी तथा जनप्रतिनिधिहरू सिलिन्डर खोजीमा जुटेका छन्।
