प्रस, पोखरिया, १ असार/
पोखरिया नगरपालिकाका प्रमुख प्रद्युम्न चौहानले स्वच्छ नेपाल एपको उद्घाटन गरेका छन्।
नपाको आयोजना र इलाका प्रहरी कार्यालय, पोखरिया, सशस्त्र प्रहरी बेस क्याम्प, पोखरिया अस्पताल, जिल्ला उच्चाङ्गल रामदेव कलवार मावि, युवा समाजको सहयोगमा ‘सफा पोखरिया–स्वच्छ पोखरिया’ नाराका साथ एपको उद्घाटन गरिएको हो।
नगरप्रमुख चौहानले यो कार्यक्रम नगर तथा गाउँका लागि महत्वपूर्ण रहेको बताए। यसले नगरको सरसफाइमा टेवा पुग्ने बताए।
प्रशासन शाखा प्रमुख अजय श्रीवास्तवको अध्यक्षतामा भएको कार्यक्रममा उपप्रमुख रूबी ठाकुर, सशस्त्र प्रहरी नायब उपरीक्षक किरणप्रकाश खत्री, प्रहरी निरीक्षक मोहन विक्रम केसी, वडाध्यक्ष लक्ष्मण साह कानूलगायतले मन्तव्य व्यक्त गरेका थिए। कार्यक्रमको सञ्चालन सुजित गिरीले गरेका थिए।
एप निर्माता प्रथम तुल्स्यानले सो एप नगरपालिकालाई निश्शुल्क उपलब्ध गराएका थिए। जथाभावी हुने फोहोरबारे एपमार्फत नपालाई जानकारी गराउन सकिने तुल्स्यानले बताए।
