प्रस, महोत्तरी, २० पुस/
प्रहरीले सोमवार राति लागूऔषधसहित चारजना युवकलाई पक्राउ गरेको छ। पक्राउ पर्नेमा महोत्तरी जिल्लाको रामगोपालपुर नगरपालिका वडा नं ६ बस्ने २७ वर्षीय शत्रुघ्न मुखिया, सर्लाहीको लालबन्दी नगरपालिका वडा नं ४ का १७ वर्षीय वीरेन्द्र मुखिया, सोही स्थानका १८ वर्षीय सुरेश मुखिया र बरहथवा नगरपालिका वडा नं ७ घर भएका १४ वर्षीय किशोर सुमन श्रेष्ठ छन्।
जिल्ला प्रहरी कार्यालय, महोत्तरीका प्रहरी नायब उपरीक्षक प्रकाश विष्टका अनुसार राति करीब ८ बजेको समयमा भारतको सीतामढीस्थित कन्हमाबाट नेपाल आएका युवकहरूमाथि शङ्काको आधारमा औरही नगरपालिका वडा नं ४ स्थित सडकमा चेकजाँच गर्दा लागूऔषध बरामद भएको हो।
उनीहरूको साथबाट प्रहरीले नाइट्रोभेट ट्याब्लेट ३७५ थान, स्पास्मो प्रो आठ थान र डाइलेक्स सिरप चार बोतल बरामद गरेको जनाएको छ।
