जनकपुर, २३ असार/रासस
आगामी आर्थिक वर्षको बजेट संशोधनको माग गर्दै जनता समाजवादी पार्टी (जसपा) नेपालले मधेस प्रदेशसभा बैठक अवरुद्ध गरेको छ।
आइतवरको बैठकमा बजेटबारे छलफल गर्ने कार्यसूची रहे पनि बैठक शुरू हुनासाथ जसपा नेपालका तर्फबाट प्रदेशसभा सदस्य राजुप्रसाद गुप्ताले असार १६ गते मुख्यमन्त्रीलाई बुझाइएका तीन बुँदे मागका बारेमा सरकारको आधिकारिक धारणा माग गरे। उनले बजेट संशोधनका लागि ध्यानाकर्षणपत्र बुझाउँदासमेत अहिलेसम्म सम्बोधन नभएकाले बैठक चल्न नदिने बताए।
सभामुख रामचन्द्र मण्डलले गत शुक्रवारको बैठक अवरुद्ध भएपछि विनियोजन विधेयक–२०८१ संशोधन गर्ने सहमति भइसकेकाले बैठक सञ्चालनमा सहयोग गर्न आग्रह गरेका थिए। सांसद गुप्ताले बजेट संशोधनबारे छलफलपछि मात्रै बजेटबारे थप प्रक्रिया अगाडि बढ्ने बताएपछि जसपाका सबै सांसदले उठेर अवरोध जारी राखे।त्यसपछि सभामुख मण्डलले १० मिनेटका लागि बैठक स्थगित गरे।
