प्रस, सप्तरी, २५ भदौ/
सप्तरी जिल्लाका विभिन्न स्थानमा २४ घण्टाभित्र भएका छुट्टाछुट्टै घटनामा तीनजनाको मृत्यु भएको छ । शम्भुनाथ नगरपालिका वडा नं ३ कचन्दाहाका २५ वर्षीय कृष्ण मण्डलको पोखरीमा डुबेर मृत्यु भएको छ ।
बिहीवार साँझ घरनजीकैको सार्वजनिक पोखरीमा डुबेर उनको मृत्यु भएको सप्तरी प्रहरीका प्रवक्ता एवं प्रहरी नायब उपरीक्षक माधवप्रसाद काफ्लेले जानकारी दिए ।
यसैगरी, जिल्लाको तिलाठी कोइलाडी गाउँपालिका वडा नं ३ सकरपुराका ११ वर्षीय बालक चन्दन ठाकुरको करेन्ट लागेर मृत्यु भएको छ । आफ्नै घरमा जडान गरिएको डिश होमको रिसिभर सफा गर्ने क्रममा उनलाई करेन्ट लागेको थियो । बालक ठाकुरको घटनास्थलमैं मृत्यु भएको जिल्ला प्रहरी कार्यालय सप्तरीले जनाएको छ ।
यसैबीच, सदरमुकाम राजविराजमा ट्याक्टरले मोटरसाइकललाई ठक्कर दिंदा एकजनाको मृत्यु भएको छ । राजविराज नगरपालिका–५ स्थित राजविराज–कुनौली सडकखण्डमा को.७प ४४१० नम्बरको मोटरसाइकललाई स.१त २८७८ नम्बरको ट्याक्टरले ठक्कर दिंदा मोटरसाइकलको पछाडि सवार विष्णुपुर गाउँपालिका वडा नं ५ कट्टी बस्ने ६० वर्षीय लेल्है खङ्गको मृत्यु भएको प्रहरीले जनाएको छ ।
ठक्करबाट घाइते भएका उनको उपचारको क्रममा गजेन्द्रनारायण सिंह अस्पताल राजविराजमा मृत्यु भएको प्रहरीले जनाएको छ ।
