लहान, १७ भदौ/रासस
राष्ट्र सेवक कर्मचारी वृक्षारोपण अभियान २०७८ अन्तर्गत सिरहाको कर्जन्हा नगरपालिका–३ स्थित कमलादेवी सामुदायिक वनको पाँच बिघा क्षेत्रफलमा कर्मचारीले वृक्षारोपण गरेका छन् ।
वृक्षारोपण गरी वन क्षेत्रको विस्तार गर्ने उद्देश्यका साथ बुधवार एकै दिन सामुदायिक वनको पाँच बिघा क्षेत्रफल जग्गामा वृक्षारोपण गरिएको डिभिजन वन कार्यालयका प्रमुख सुभाषचन्द्र दासले जानकारी दिए । डिभिजन वन कार्यालय र जिल्ला प्रहरी कार्यालयको संयुक्त आयोजनामा उक्त सामुदायिक वनमा आँप, जामुन, मसला, खयर र साललगायत जातका बिरुवा रोपेको प्रमुख दासले बताए ।
प्रमुख जिल्ला अधिकारी प्रदीपराज कणेलको नेतृत्वमा गरिएको वृक्षारोपणमा डिभिजन वन कार्यालयका प्रमुख, विभिन्न सरकारी कार्यालयका कर्मचारी, नेपाली सेना, नेपाल प्रहरी, सशस्त्र प्रहरी बल तथा स्थानीय जनप्रतिनिधिको उपस्थिति थियो ।
