काठमाडौं, ३ फागुन/रासस
नेपाल प्रहरीले पाँच लाख डेनिस क्रोनसहित दुईजना पाकिस्तानी नागरिकलाई पक्राउ गरी बिहीवार सार्वजनिक गरेको छ ।
उनीहरू त्रिभुवन अन्तर्राष्ट्रिय विमानस्थलबाट बुधवार साँझ पक्राउ परेको प्रहरीले जनाएको छ । पक्राउ पर्नेमा ३१ वर्षीय यासिन अहमद र ४८ वर्षीय मोहम्मद अदनान लखानी रहेको केन्द्रीय प्रहरी प्रवक्ता तथा प्रहरी नायब महानिरीक्षक भीमप्रसाद ढकालले जानकारी दिए ।
उनले भने, “फ्लाई दुबईको उडानबाट दुबईबाट नेपाल आएका उनीहरूलाई अन्तर्राष्ट्रिय उडानतर्फको आगमन टनेल गेटबाट करीब रु ९५ लाख ४३ हजार ३८४ नेपाली हुन आउने उक्त विदेशी मुद्रा अवैधरूपमा लुकाइछिपाइ लैजान लागेको अवस्थामा फेला पारी दुवैजनालाई पक्राउ गरेका छौं ।”
पक्राउ परेका निज पाकिस्तानी नागरिकलाई आवश्यक अनुसन्धान एवं कारबाईका लागि राजस्व अनुसन्धान विभाग हरिहर भवन पुल्चोक ललितपुर पठाइने केन्द्रीय प्रहरी प्रवक्ता ढकालले बताए ।
