वित्तीय साक्षरताको प्रशिक्षणका सिलसिलामा केही महीनाअघि राजधानीको एक विद्यालयका विद्यार्थीले गरेको प्रश्न आजसम्म मेरो मानसपटलमा गुञ्जिरहेको छ, “के म पनि करोडपति बन्न सक्छु ?” त्यो १० वर्षको अबोध बालकलाई मैले त्यतिखेर भनेको थिएँ, अवश्य तिमीहरू भाग्यमानी छौ, सानो उमेरमैं वित्तीय ज्ञान थाहा पाइरहेका छौ, थप कम्पाउन्डिड्ढो शक्ति थाहा पाउन सकियो भने प्रत्येक महीना केवल रु पाँच हजार अर्थात् एक वर्षमा रु ६० हजार लगानी गरेर वार्षिक १२ प्रतिशत प्रतिफल निकाल्न सक्ने हो भने सजिलै तिमी ३० वर्षमा करोडपति बन्न सक्छौ। यदि ३६ वर्ष तिमी कुर्न सक्छौ भने रु एक करोड ९७ लाखको मालिक हुनेछौ। प्रतिफल दर र लगानी रकम बढाउन सक्ने हो भने त्योभन्दा अगाडि नै करोडपति हुन सकिन्छ। मैले उक्त कक्षामा दिएको जवाफ र देखाएको टेबल विद्यार्थीहरूले बुझे बुझेनन् थाहा छैन। उनीहरूमा धैर्यता र दृढता हुर्काउन सकियो सकिएन भन्न सक्दिनँ, तर सो बालकको प्रश्नले मलाई हरेक व्यक्ति कसरी करोडपति बन्न सम्भव छ भन्ने विषयले घोचि नै रहेको छ।
लगानीमा समय यतिधेरै शक्तिशाली हुन्छ, जसले प्रत्येक व्यक्तिलाई कुर्न सक्ने हो भने करोडपति बनाउन सक्ने ल्याकत राख्छ। संसारका असाधारण लगानीकर्ता भनेर कहलिएका वारेट बफेटका सम्बन्धमा दुई हजारभन्दा बढी पुस्तक लेखिएको छ। बफेट धनी हुनुमा उनको अब्बल लगानी कला मात्रै नभई नाबालक हुँदादेखिकै अब्बल लगानी हो भन्ने सारांश रहेको भेटिन्छ। बफेटले १० वर्षको उमेरमा लगानी सुरुआत गरेर त्यसलाई फैलाउँदै आफू ३० वर्षको हुँदा एक मिलियन डलर बनाइसकेका थिए।
वास्तवमा उनी उत्कृष्ट लगानीकर्ता मात्रै नभई धीर पनि थिए। उनले अहिले जीवनको नौ दशक पूरा गरी रहँदा आठ दशक अर्थात् जीवनको करीब ९० प्रतिशत समय लगानीमा बिताइसकेका छन्। ‘धनसम्पत्तिको मनोविज्ञान’ किताबका लेखक मोर्गन हउजलका अनुसार बफेट सफल लगानीकर्ता त हुन् तर संसारकै उत्कृष्ट लगानीकर्ता भनेर भन्न सकिंदैन। सन् २०२० मा उनले लेखेको उक्त पुस्तकमा बफेटले लगानीमा औसत प्रतिवर्ष २२ प्रतिशत प्रतिफल पाउने गरेको बताएका छन्। त्यस समयमा उनको सम्पति ८४.५ बिलियन डलर थियो। यदि उनले ६० वर्षमा लगानी गर्न छोडिदिएका भए ११.९ मिलियन मात्रै हुन सक्थ्यो। जुन पुस्तक लेख्दै गरेको समयको करीब ९९.९ प्रतिशत कम हुने थियो। यसको मूल कारण उनको लगानी कुशाग्रता हो तर वास्तविकता भनेको समय हो। यथार्थमा कम्पाउन्डिङले यस्तै काम गर्छ।
लेखकका अनुसार बफेटले वार्षिक २२ प्रतिशत लगानीमा प्रतिफल निकाल्दै गर्दा हेज फन्ड रिनेसान्स टेक्नोलोजीका प्रमुख जिम साइमन्सले सन् १९८८ बाट लिएर ६६ प्रतिशत प्रतिवर्षको दरले धनको कम्पाउन्डिङ गरे। उक्त किताब लेख्दै गर्दा उनको सम्पत्ति २१ बिलियन थियो तर बफेटले त्यसको एक तिहाइ मात्रै प्रतिफल निकाल्दै गर्दा समेत साइमन्सको भन्दा ७५ प्रतिशत बढी कमाउन सफल भए। बफेटभन्दा करीब तीन गुणा बढी प्रतिफल निकाल्न सकेर पनि उनी किन कम धनी भए। यसको मूल कारण साइमन्नले ५० वर्षको उमेर पुगेपछि लगानी थालेका थिए। यसले गर्दा उनीसँग बफेटको जस्तो लामो समय कम्पाउन्डिङ गर्ने सुविधा थिएन, त्यसैको परिणाम दुईबीच यतिधेरै सम्पत्तिको अन्तर पर्न गएको हो। यदि बफेटले जस्तै साइमन्सले पनि लगानी गर्न सकेको भए ६३ क्विन्टिलियन नौ सय क्वाड्रिलियन ७८१ ट्रिलियन ७८० बिलियन ७४८ मिलियन र १०८ हजार डलर हुने थियो। यी आँकडा हास्यास्पद र अव्यावहारिक देखिन्छ तर कम्पाउन्डिड्ढा कारण यस्तै आँकडाहरूलाई देखाउन सक्छन्। तसर्थ प्रत्येक व्यक्ति करोडपति बन्न सक्छ र धनी पनि हुन सक्छ तर लगानीमा धैर्यता सबैभन्दा ठूलो ईश्वरीय वरदान हो, यसलाई सबैले बुझ्न सकेमा धनको महत्वपूर्ण नियम थाहा पाई सफल लगानीकर्ता हुन सकिन्छ।
अल्बर्ट आइन्स्टाइनले भनेका थिए, “कम्पाउन्डिङ विश्वको आठौं आश्चर्य हो।” स्वयम् बफेटले भनेका छन्, “लगानीमा कुनै चमत्कार छ भने त्यो कम्पाउन्डिड्ढो तागत हो।” तसर्थ लगानीमा भएका कमजोरी र गलतीहरू लामो समयपछि फिक्का हुँदै जान्छन्। पछिल्ला वर्षहरूमा सम्पत्ति वृद्धिका दर प्रारम्भिक वर्षहरूको तुलनामा धेरै गुणा बढी रहने गर्छ। यसलाई माथिको टेबलबाट पनि हेर्न सकिन्छ। उक्त टेबलमा थालनीको समयदेखि लगानीको ३० वर्षसम्म रु एक करोड आठ लाख धन जम्मा हुँदा पछिला थप छ वर्षमा रु ९८ लाख थपिने देखिन्छ। यसरी हेर्दा पाँच भाग समय लगाएर जम्मा भएको रकम र पछिलो एक भाग समयमा जोडिएको सम्पत्तिको अंश करीब बराबर देखिन्छ। यसले के देखाउँछ भने कम्पाउन्डिड्ढो नियमभित्र पनि जति धेरै पछिल्ला वर्ष आउँछन्, उति धेरै द्रुत गतिमा सम्पत्ति बढ्नेछ। हरेक व्यक्ति सम्पत्ति कमाउन र रमाउन सक्छ, यसका लागि केही ज्ञान, अभ्यास र धेरै धैर्यता राख्ने हो भने यो सजिलै सम्भव देखिन्छ।
लगानीमा अनेकन रणनीति र योजना हुन सक्छन् तर प्रत्येक उत्कृष्ट लगानीमा समय सबैभन्दा महत्वपूर्ण हुने गरेको छ। कम्पाउन्डिङलाई बुझ्न सकियो भने लगानीलाई कम जोखिममा बढी प्रतिफलमुखी बनाउन सकिन्छ। यसलाई बुझ्न केही समय लाग्छ तर बुझिसकेपछि यसले दिने लाभ कल्पना गरिएभन्दा बढी देखिन्छ। यसको नतीजा आउन समय लाग्छ तर सजिलै बुझिएको जोडफलभन्दा यो तीन करोड ८७ लाख गुणा बढी हुन जान्छ। यसैले कम्पाउन्डिङले लगानीमा दिने चमत्कार पनि दोस्रो उदाहरण जस्तै हो, जसले परिणाम देखाउन समय लगाउँँछ तर अप्रत्याशित फल दिन सक्छ। जापानी नागरिकहरूमाझ अत्यधिक लोकप्रिय काइजन थ्योरी (थोरैबाट प्रारम्भ गरी बानी बसाल्ने सिद्धान्त) र रु पाँच हजारबाट करोडपति सिद्धान्तमा धेरै समानता भेटिन्छ। यस विधिले एकैपटक ठूलो कदम उठाउनुभन्दा बिस्तारै साना पाइलाहरूबाट सुरुआत गर्न प्रेरित गर्छ। यसले हामीले चाल्ने हरेक साना प्रयासले ठूलो उपलब्धि दिन सक्छ भन्ने विश्वास राख्छ। सबैभन्दा ठूलो लक्ष्यप्राप्तिका लागि एकैपटक बृहत् फड्कोभन्दा नियमित थोरै अभ्यासमार्फत आफूमा बानी पार्नु र त्यसलाई बढाउँदै लैजान सक्नु महत्वपूर्ण हुने गर्छ। उदाहरणका रूपमा हामीले पहिलो दिनमा घण्टौं व्यायाम गर्ने र एक हप्तामा फेरि छाड्ने गरेका धेरै देखेका छौं। यसो नगरी सुरुआती दिनमा केही मिनेटबाट थालेर त्यसलाई क्रमशः बढाउँदै लैजानेहरूले पछि घण्टौंसम्म व्यायाम गर्ने आफ्नो व्यवहारको विकास गर्न सफल हुन्छन्। यो एकै दिनमा नभई प्रत्येक दिन एउटा ढुङ्गा पुलबाट खोलामा फ्याँकेर बाटो बनाए जस्तै हो।
भारतको बिहारमा रहेको गेहलौर गाउँमा दशरथ माझी बस्ने गर्थे। यस ठाउँको अगाडि एक भीमकाय पहाड थियो। यसलाई छिचोलेर अर्को गाउँमा जान असम्भव थियो। यस पहाडले थुप्रैको जीवन निलेको थियो। यस्तैमा उनको पत्नीलाई पनि यसले हत्या गरेको थियो। पत्नीको वियोगमा उनले अठोट गर्छन् कि म यस हत्यारा पहाड छेडेर बाटो बनाउनेछु, यसले कसैलाई निल्न सक्ने छैन। उनी आफ्नो प्रतिज्ञा पूरा गर्न पहाडतिर हातमा हथौडा बोकेर निस्कन्छन्। सारा गाउँवासी र उनलाई देख्नेहरू माझी पागल भयो भन्ने गर्थे तर उन्ले भित्ता कोतार्न छोडेनन्। करीब २२ वर्षको अथक मेहनतपछि एक्लैले बाटोभन्दा ठूलो सडक बनाएर देखाइदिए। आज उनलाई संसारभर ‘माउन्टेन म्यान’ भनेर चिनिन्छ। यसैले सोच्नुहोस्, प्रयास गर्नुहोस् र पाउनुहोस्। सुरुआत आजै गरौं, मासिक रु पाँच हजार लगानी र वार्षिक १२ प्रतिशत प्रतिफलमा धितोपत्र बजार, सरकारी बन्ड र बैंकहरूमा फिक्स डिपोजिटलगायतका उपकरणमा टेबलमा देखाइए जस्तै योजनाबद्ध ढङ्गबाट लगानी गरी करोडपति यात्रा थालनी गरौं।
वारेट बफेटले आफ्ना अन्तर्वार्ताहरूमा भनेका छन्, पहिलो शेयर कारोबारमा धैर्यता राख्न नसक्दा धेरै मुनाफा छोड्नुपरेको थियो। तब उनका बुबाले उनलाई हिउँको बीचमा लगेर त्यसलाई देखाउँदै भनेका थिए लगानी र हिउँको डल्लो उस्तै हो। हेर यो हिउँको डल्लोलाई जति टाढासम्म गुडाउन सक्छौं, अरू हिउँहरू जोडिएर धेरै ठूलो डल्लो बन्दै जानेछ। लगानी पनि यस्तै हो, जति धेरै लामो समयसम्म छोड्न सक्छौं, त्यति धेरै हुने निश्चित छ। त्यसपछि बफेटले सधैं लामो दौडको घोडामा लगानी गर्न सिकेका कारण उनी संसारका सफल लगानीकर्ता बन्न सम्भव भयो। हामीले पनि लगानी लामो समयको लागि छनोट गर्न सक्यौं भने सफलताहरू हात पर्ने निश्चित छ।
चीनमा पाइने एउटा बाँसको प्रजाति छ, जसको बिरुवालाई चार वर्षसम्म पानी हाल्ने र गोडमेल गर्ने गरे पनि फस्टाएको देख्न सकिन्न। तर पाँचौं वर्षमा जब बाँस फस्टाउन थाल्छ र छ हप्ताभित्रै ९० फिट लामो हुन पुग्छ। अनि प्रश्न के उठ्छ भने बाँस छ हप्तामा फस्टाएको हो ? यदि चार वर्षसम्म हेरविचार नगरेको भए फस्टाउँथ्यो होला त ? पक्कै पनि फस्टाउँदैनथ्यो। यस घटनाले के कुरा स्पष्ट गर्छ भने हामीले धैर्य राख्नुपर्छ र सही काम गर्दै जानुपर्छ। परिणाम अहिल्यै नदेखिए पनि केही न केही भइरहेकै हुन्छ। लगानीमा पनि कम्पाउन्डिड्ढो शक्ति यस्तै हुने गर्छ। यसैले सम्पन्नताको आधार लगानी र लगानी सफलताको सजिलो उपाय कम्पाउन्डिङ शक्तिको प्रयोगलाई अभ्यासमा ल्याउनु हो।
कम्पाउन्डिड्ढो चटकलाई बुझेर वर्षमा गरिएको केही हजारको लगानीले करोडपति बन्न सम्भव रहेको हुँदा आफ्नो वित्तीय रणनीति बनाउँदा कम्पाउन्डिङलाई विशेष ध्यान दिन आवश्यक छ। पुस्तक ‘लिभिङ द एटी ट्वान्टी वे’का लेखक रिचार्ड कोचका अनुसार २० प्रतिशत धनाढ्यले कम्पाउन्डिङ मिराकलका कारण ब्रह्माण्डको ८० प्रतिशत सम्पत्ति नियन्त्रणमा राख्न सम्भव भएको छ। तर कम्पाउन्डिड्ढो प्रयोग र महत्व बुझ्न नसक्दा ८० प्रतिशत मानिसले २० प्रतिशत सम्पत्तिमा निर्वाह गर्नुपरेको छ। स्मार्ट लगानीकर्ता बढी प्रतिफल पाउन चक्रीय ब्याजदरको प्रयोग गर्ने गर्छन्। यसैले तपाईं जति छिटो लगानीमा कम्पाउन्डिङ गर्न थाल्नुहुनेछ, लगानीले चमत्कार देखाउन उति नै छिटो सम्भव रहन्छ। राम्रो सुरुआतले राम्रो अन्त्यमा पु–याउँछ। (लेखक धितोपत्र बजारका लगानीकर्ता हुन्/रासस)
