अजयकुमार साह
धनुषा, ३ जेठ/रासस
तराई–मधेसका जिल्लाहरूमा लोकमार्गदेखि दक्षिणी भेगमा हातेकल सुक्न थालेपछि व्यापकरूपमा खानेपानीको समस्या देखिन थालेको छ। तराई–मधेस क्षेत्रमा खानेपानीका लागि सबैभन्दा चल्तीको साधन हातेकल हो। चैतदेखि शुरू भएको चापाकल सुक्ने समस्या वैशाखसम्म विकराल बनेको छ।
चापाकल सुक्ने समस्या पछिल्ला दिन बढ्दै गएपछि धनुषाको क्षीरेश्वरनाथ नगरपालिकालगायत स्थानीय तहले बढी सङ्कट देखिएका स्थानमा ट्याङ्करबाट पानी बाँडिरहेका छन्। मोटर जडान गरिएर खानेपानीका लागि पर्याप्त पानी उपलब्ध हुने दक्षिणी भेगमा देखिएको समस्याको समाधान नभए विकराल परिस्थिति आउने स्थानीयहरूले चिन्ता जाहेर गरेका हुन्।
यता मधेस प्रदेशको राजधानी जनकपुरधाममा नै खानेपानीको अभाव देखिन थालेको छ। जनकपुरधाम नगर क्षेत्रमा दैनिक दुई करोड ५० लाख लिटर पानीको माग रहे पनि खानेपानी संस्थान जनकपुरधामले पाइपमार्फत वितरण गर्ने दैनिक ३० लाख लिटर पानी मात्र आपूर्ति गर्दै आएको छ। यसरी संस्थानले १२ प्रतिशत घरमा मात्र पाइपमार्फत पानी आपूर्ति गर्दै आइरहेको र ८८ प्रतिशत घरधुरी अहिले पनि खानेपानीको पहुँच बाहिर रहेको देखिन्छ।
सुक्खायाममा यहाँका चापाकलहरू सुक्ने गरेका छन् भने खानेपानी संस्थानले सबै ठाउँमा पानीसमेत पु–याउन नसकिरहेको अवस्थामा जनकपुरधाममा निकट भविष्यमैं खानेपानीको गम्भीर समस्या उत्पन्न हुने सर्वसाधारणको भनाइ छ। मधेस प्रदेशको राजधानीमैं खानेपानीको समस्या देखिए पनि यस विषयमा प्रदेश सरकार गम्भीर नदेखिएको स्थानीयवासीको गुनासो छ।
राष्ट्रिय जनगणना २०७८ को तथ्याङ्क अनुसार मधेस प्रदेशको राजधानी जनकपुरधाममा ४० हजार ४०९ घरपरिवारमध्ये खानेपानी सस्थानले हालसम्म चार हजार ६८५ घरमा मात्र धारा जडान गरेको छ। जडान धारामध्ये ४४ प्रतिशत जति घरमा आंशिक मात्र पानी आउने गरेको छ। संस्थानले जनकपुरधाम उपमहानगरपालिकामा रहेका २५ वटा वडामध्ये १४ वटा वडामा चार हजार ६८५ घरमा मात्रै धारा जडान गरेको र जडान भएका धारामध्ये ५६ प्रतिशतमा मात्रै पूर्णरूपमा पानी आउने गरेको संस्थानका प्रमुख विष्णुदेव साहले बताए।
संस्थानले जनकपुरधाम–१० र रामानन्द चोकमा निर्माण भएको चार लाख ५० हजार क्षमताका दुईवटा ओभरहेड टङ्कीमा छवटा डीप बोरिङबाट सङ्कलित भूमिगत पानी प्रशोधन गरी वितरण गरिरहेको छ। तर ३४ वर्ष पुरानो वितरण प्रणालीका कारण ठाउँठाउँमा पाइप फुटेको, चर्केको र जीर्ण रहेकोले धेरै ठाउँमा खानेपानी पु–याउन नसकिएको प्रमुख साहले बताए। सीमित बजेटका कारण ३४ वर्ष पुरानो तथा जीर्ण पाइपका कारण सबै वडामा खानेपानीको आपूर्ति हुन सकेको छैन। करीब ५० प्रतिशत पानी मात्रै नियमित आपूर्ति हुने गरेको छ।
संस्थानले चालू आर्थिक वर्षमा कार्यालयभित्र रु एक करोड ३० लाख मूल्य बराबरको लागतमा थप पाँच लाख लिटर क्षमताको टङ्की, चार करोडभन्दा बढीको लागतमा मुजेलिया प्रहरी चौकीदेखि वडा नंं ८ स्थित होटल सियाशरणसम्म छ लेन सडक छेउमा सात किलोमिटर लामो सडकको दायाँबायाँ आठ/आठ इन्चको पाइप बिछ्याउने कार्य गरिरहेको छ। सीमित स्रोतसाधन भएपनि संस्थाले पाँच लाख लिटर पानी भण्डारण हुने र चालू आर्थिक वर्षमा थप एक हजारवटा धारा जडान गर्ने लक्ष्य लिएको छ।
यस कारण सुक्दैछन् हातेकल
जलस्रोत विज्ञहरूले चुरेको दोहन र लामो समयदेखि पानी नपरेपछि भूमिगत पानी पुनर्भरण नहुनुले मधेस प्रदेशका केही जिल्लामा भूमिगत पानीको सतह घटेर हातेकलहरूमा पानी नआएपछि खानेपानीका लागि समस्या उत्पन्न भएको बताएका छन्। चुरेविज्ञ डा विजयसिंह दनुवारका अनुसार मधेस–प्रदेशमा हाल देखिएको खानेपानी समस्याको दीर्घकालीन समाधानका लागि एकमात्र विकल्प प्राकृतिक पुनर्भरणका रूपमा रहेको चुरे क्षेत्र भएकोले यसको संरक्षण नै यसको दिगो समाधान हो।
डा सिंहले पानीको समस्या समाधानका लागि राज्यले खासगरी मधेस प्रदेश सरकारले अल्पकालीन, मध्यकालीन र दीर्घकालीन योजना निर्माण गरी अघि बढ्नुपर्ने सुझाव दिए। मधेस प्रदेश चुरे संरक्षण र विकास अनुसन्धानविज्ञ नागदेव यादवले दीर्घकालीन समस्या समाधानका लागि जलस्रोत क्षेत्रका विज्ञहरूले वृक्षारोपण, चुरे क्षेत्रको संरक्षण र मधेस प्रदेशको हाइड्रो जियोलोजिक सर्भे गरी प्रदेश सरकारले कार्यक्रम तयार गर्नुपर्ने सुझाव दिएका छन्। उनले वर्षाको पानी जम्मा गरी ग्राउन्ड वाटर रिचार्ज गर्ने जस्ता कार्यक्रम निर्माण गर्न मधेस सरकारलाई सुझाव दिए।
चुरे विज्ञ विजयसिंह दनुवार बताउँछन्–“खोलामा जहाँसम्म राम्रो गिट्टी–बालुवा पाइन्छ, खोतल्ने रहेछन्। १०औं ठाउँमा खन्दा पानी रिचार्ज हुन नपाई बहावलाई असर पार्दाे रहेछ।” उनले पनि चुरे र भावर क्षेत्रमा पोखरी वा बाँध बनाएर तराईमा पानी सङ्कट टार्न सकिने सुझाव दिंदै भने–“जसरी भारतले कोशी, नारायणी, महाकाली र गण्डकीलाई बाँधेर आपूmलाई चाहिएको ठाउँ र समयमा पानी लैजान्छ, त्यसैगरी चुरे र भावर क्षेत्रका नदी–खोलामा पनि ड्याम बनाएर पानी जमाउन सकिन्छ।”
चुरे तराई–मधेस संरक्षण तथा व्यवस्थापन गुरुयोजना २०७४ अनुसार पूर्वदेखि पश्चिमसम्मकै तराईमा घरायसी प्रयोजन तथा सिंचाइमा जमीनमुनिको पानी प्रयोग हुँदै आएको छ। पानीको सतह घटबढ हुनुमा चुरे तथा भावर क्षेत्रमा हुने वर्षाको परिमाण, जमीनको सोस्ने क्षमता, गिट्टी–बालुवा उत्खननको परिणाम र प्रक्रिया आदिको प्रभाव रहन्छ।
चुरे क्षेत्रमा भइरहेको वन विनाश, प्राकृतिक स्रोतको अनियन्त्रित दोहनको असर भावर र तराईमा परिरहेको छ। चुरेबाट बगेर आउने गिट्टी–बालुवाले खोलाको सतह उचो हुँदा भावर र तराईमा भूमिगत जल सतह गहिरिंदै छ। अव्यवस्थित शहरीकरण र उद्योगीकरण, पोखरी, कुवा, इनार मासिनु, नदी अतिक्रमण हुनु, जग्गाको जथाभावी चक्लाबन्दी, वृक्षारोपणका तुलनामा रूख काट्ने दर बढी हुनु, वर्षात्को पानी संरक्षण गर्न नसक्नु र जलवायु परिवर्तनलाई पनि विज्ञहरूले पानी सङ्कट बढ्नुको कारण औंल्याउँदै आएका छन्।
चुरे र तराईबीच करीब पाँच किमी समानान्तर क्षेत्रलाई भावर भनिन्छ। तराईमा भूमिगतरूपमा जाने पानीको पुनर्भरण यही क्षेत्रमा हुने गर्छ। भावर क्षेत्रमा शहरीकरण र उद्योगीकरण जस्ता मानवीय हस्तक्षेप बढ्दा पुनर्भरण प्रक्रियामा असर परेको नेपाल विज्ञान तथा प्रविधि प्रज्ञा प्रतिष्ठानका प्राज्ञ डा दिनेशराज भुजु बताउँछन्। “पहिले त चुरे–भावर क्षेत्रका बस्ती हटाउनुपर्छ”–डा. भुजु भन्छन्–“अर्कातिर परम्परागत इनार, कुवा, पोखरी मासेर ट्युवेलमा भर पर्न थालियो, ट्युवेल कति दूरीमा गाड्ने भन्ने मापदण्ड पनि पालना गरिएको छैन।”
भूगर्भविद् श्रीकमल दवाडी जमीनमुनिको पानी जति पनि झिके हुन्छ भन्ने सोचले समस्या निम्त्याएको बताउँछन्। “भूमिगत पानी भण्डारण हुने पनि चक्र हुन्छ, चुरेको पानी तराई पुग्न समय लाग्छ”, दवाडी भन्छन्– “यस्तोमा हामीले रिचार्जतिर सोचेनौं। संरचना बनाउँदा पनि सतहमा कङ्क्रीट बिछ्याएर जमीनमा पानी छिर्ने ठाउँ नै दिंदैनौं।”
मधेस मामिलाका जानकार पत्रकार चन्द्रकिशोर समस्या समाधानको लागि तीन तहको सरकारको एकीकृत सोचाइ हुनुपर्ने बताउँछन्। उनी भन्छन्–“यो पालिकाले मात्र चाहेर समाधान हुने विषय होइन। नीति काठमाडौंबाटै बन्नुपर्छ। प्रदेशले सहजीकरण र पालिकाले कार्यान्वयन गर्नुपर्छ। चुरे मधेस प्रदेशमा मात्र पर्दैन। यस्तोमा सङ्घले दुर्ई प्रदेशबीच समन्वय गराइदिनुपर्ने हुन सक्छ।”
उनी भन्छन्–“पानीमा दैनिक जीवन, संस्कार र खेतीपातीसम्मका कुरा निर्भर हुन्छ। अर्कातिर तराई–मधेस ठूलो जनघनत्व भएको ठाउँ हो।” पानी नहुँदा मान्छेको बसाइँसराइ हुने क्रम बढ्न थालेको छ।
सिराहामा कमला नदीदेखि लहानसम्म राजमार्गभन्दा उत्तरतिरका बस्तीमा गाईवस्तु पाल्न कम भएको छ। आर्थिक स्रोत बलियो भएकाहरू पानी भएको ठाउँमा सर्न थालेका छन् भने विपन्न समुदायका मानिसको जनजीवन निकै कष्टकर बन्दै गएको छ। पानीकै कारण मानिसहरू ‘वातावरणीय शरणार्थी’ बन्नुपर्ने अवस्था आउन सक्ने उनको भनाइ छ।
