किमाथाङ्का, २२ भदौ/रासस
संखुवासभाको मादी नगरपालिका–१ खोलागाउँको उम्लिङमा एकै परिवारका छजनाको बीभत्स हत्याको घटना सम्बन्धमा प्रहरीले सूक्ष्म अध्ययन तथा अनुसन्धान शुरू गरेको छ ।
सङ्घीय प्रहरी कार्यालय धरानबाट प्रहरी उपरीक्षक भीमबहादुर दाहाल नेतृत्वको विशेष टोलीले घटनास्थल पुगेर सूक्ष्म अध्ययन तथा अनुसन्धान शुरू गरेको हो ।
सोमवार बिहान एकै परिवारका छजनाको हत्या भएको खबर जानकारी हुने बित्तिकै स्थानीय प्रहरी, इलाका प्रहरी चैनपुर र जिल्ला प्रहरी कार्यालयबाट घटनास्थलमा प्रहरी पुगेको थियो । घटनास्थल पुगेका प्रहरीले छजनाको शव घरवरिपरि विभिन्न स्थानमा छरपस्ट भेटेका थिए ।
घटनाको प्रकृति हेर्दा जिल्ला प्रहरीले मात्र घटनाको पर्याप्त अनुसन्धान हुन नसक्ने भएपछि सङ्घीय प्रहरी कार्यालय धरानबाट तालीमप्राप्त कुकुरसहित प्रहरीको विज्ञ टोलीलाई बोलाइएको थियो । उक्त टोलीले घटनास्थलको सूक्ष्म अध्ययन गरिसकेपछि शव परीक्षणका लागि मङ्गलवार विपी कोइराला स्वास्थ्य विज्ञान प्रतिष्ठान धरान पठाइएको छ ।
घटनाको थप अध्ययनका लागि तालीमप्राप्त कुकुरसहितको विज्ञ र प्रहरी टोली अभियुक्त पत्ता नलागेसम्म घटनास्थलमा नै रहने जनाइएको छ । घटनालाई थप अध्ययन तथा अनुसन्धानका लागि नेपाल प्रहरीको केन्द्रीय अनुसन्धान ब्यूरो (सिआइबी) लगायतको टोली घटनास्थल आउँदै गरेको जिल्ला प्रहरी कार्यालयका प्रहरी प्रमुख एवं प्रहरी नायब उपरीक्षक लालध्वज सुवेदीले जानकारी दिए ।
८५ वर्षीय बौद्धमान कार्कीको परिवारमा उक्त नरसंहार भएको हो । घरमा रहेका सातजनामध्ये उनी मात्रै सकुशल छन् । अरू छजनाको भने हत्या गरिएको अवस्थामा यत्रतत्र शवहरू भेटिएका थिए । प्रहरीका अनुसार बौद्धमानकी पत्नी ८४ वर्षीया पार्वता, छोरा ५८ वर्षीय तेजबहादुर, बुहारी ५२ वर्षीया कमला तथा तेजबहादुरकी बुहारी ३२ वर्षीया रञ्जना, नाति ११ वर्षीया दीपेन र नातिनी ७ वर्षीया गोमा कार्कीको हत्या भएको हो ।
एउटै परिवारका छजनाको हत्या भएपछि पूरै गाउँ शोकमा डुबेको वडाध्यक्ष खेमनाथ कटुवालले बताए । “सिङ्गो गाउँँमा सन्नाटा छाएको छ । कसैले पनि यस्तो दर्दनाक घटना कसरी भयो होला भनेर सोच्नसम्म सकिरहेका छैनन्,” उनले भने, “घटना देखेका र सुनेका छिमेकीहरू कसैको घरमा चुल्हो बलेको छैन ।” घटनाको अनुसन्धानमा स्थानीय बासिन्दा र जनप्रतिनिधिले पनि प्रहरीलाई सहयोग गरिरहेको वडाध्यक्ष कटुवालले जानकारी दिए ।
उनका अनुसार हत्या बिहान वा राति नै गरिएको हो भन्ने यकीन हुन बाँकी छ । वृद्ध अवस्थाका बौद्धमानले पनि घटनाका बारेमा आफूले थाहा नपाएको बताएका छन् । मृतक सबैको शव घरबाट लगभग सय मिटरको आसपासमा भेटिएको थियो । प्रहरी र स्थानीयवासीका अनुसार तेजबहादुरको शव घरदेखि करीब ७० मिटर पर सडकको भित्तामा, पार्वतीको घरैमा सुतिरहेको अवस्थामा, कमला र रञ्जनाको घरनजीकैको खोल्सीमा तथा दीपेन र गोमाको घरमाथि खरबारीमा शव फेला परेको थियो ।
घटना राति भयो कि बिहान अझै अन्योल
यो घटना सोमवार बिहान अथवा आइतवार बेलुका कति बेला भएको हो भन्ने अन्योल रहेको छ। स्थानीयवासी बौद्धमानका अनुसार सपरिवार बेलुका ६/७ बजेतिर खाना खाएर सुतेका थियौं। बिहान एक्कासि यस्तो देखियो अचम्मैमा परें । घटनामा परेकाको शवको अवस्थालाई हेर्ने हो भने तेजबहादुरले गम्बुट (जुत्ता) र कोट लगाएका छन् भने अन्य पाँचजनाले चप्पल, स्यान्डल लगाएका थिए । सोबमोजिमको प्रकृतिलाई हेर्दा घटना कतिबेला भएको हो भनेर सोझै अनुमान गर्न सक्ने स्थिति छैन ।
यो घटनालाई विश्लेषण गर्ने हो भने बेलुका खाना खाएर सुतेका चप्पल, जुत्ता नलगाएको हुनुपर्ने हो । घटना बिहानैको हो भने पनि भागदौड गर्दा जुत्ता, चप्पल उनीहरूले कसरी लगाउन भ्याए ? हत्या गरिएका छजनाको नै टाउकोमा सामान्य चोट र रगत जमेको पाइएको छ । विभिन्न सञ्चारमाध्यममा प्रकाशन र प्रसारण भए अनुसार धारिलो हतियार प्रयोग गरी हत्या गरिएको भनिए पनि त्यस्तो नभएको पाइएको हो । उनीहरूको शव घोप्टिएको अवस्थामा रहेको थियो ।
