प्रस, वीरगंज, २७ पुस/
इम्प्रुभिङ वीरगंजको आयोजनामा पाँचौं एकताका लागि दौड प्रतियोगिता सम्पन्न भएको छ।
पृथ्वी जयन्ती र राष्ट्रिय एकता दिवसको अवसरमा शनिवार आयोजित एकता दौड प्रतियोगितामा छात्रतर्फ अमरनाथ साह प्रथम, रूपेश माझी द्वितीय र रोहन माझी तृतीय भए भने छात्रातर्फ कल्सुन खातुन प्रथम, प्रीति पटेल द्वितीय र सरीता भुल तृतीय भए। उनीहरूलाई कप, मोबाइल, ट्र्याकसुट र नगदबाट पुरस्कृत गरिएको थियो। इम्प्रुभिङ वीरगंजका अध्यक्ष शरण गुप्ताको अध्यक्षतामा भएको दौड प्रतियोगिताको उद्घाटन नगरप्रमुख राजेशमान सिंहले गरेका थिए।
यसैगरी, ३०३औं पृथ्वी जयन्ती तथा राष्ट्रिय एकता दिवस देशभक्त राजभक्त समूह पर्साले कार्यक्रम गरी मनाएको छ। वीरगंज–६ महावीर मन्दिर प्राङ्गणमा आयोजित कार्यक्रममा समूहका अध्यक्ष दीपेन्द्र रौनियारसहित पशुपति विक्रम शाह, पृथ्वी झा, वीरेन्द्र थापा, ध्रुवसिंह ठकुरी, अब्दुल सतार मियाँलगायतले राष्ट्रपिता पृथ्वीनारायण शाहको योगदानबारे प्रकाश पारेका थिए।
