प्रस, वीरगंज, २७ पुस/
नेपाल जनता पार्टी, पर्साले श्रीराम जन्मभूमि अयोध्या मन्दिरमा भगवान् श्रीरामको प्राणप्रतिष्ठान भएको प्रथम वार्षिकोत्सवको उपलक्ष्यमा शनिवार वीरगंजमा शोभायात्रा निकालेको छ।
पौष शुक्लपक्ष द्वादशी तिथिको दिन श्रीराम मन्दिर अयोध्याधाममा भगवान् श्रीरामको प्राणप्रतिष्ठान भएको दिन आज नेजपाले जिल्ला प्रहरी कार्यालय, पर्सा अगाडिबाट शोभायात्रा निकालेर नगरपरिक्रमा गर्दै सोही स्थानमा पुगेर समापन भएको थियो। बाजागाजासहितको शोभायात्रामा भगवान् श्रीराम, माता जानकी, भगवान् लक्ष्मण, हनुमानजीको झाँकीसहित ‘जय श्रीराम’, ‘हर हर महादेव’, ‘नेपाललाई हिन्दू राष्ट्र घोषणा गरियोस्’, ‘धर्मनिरपेक्षता खारेज होस्’ नारा लगाइएको थियो।
यसैगरी, हिन्दू परिषद् नेपालले पनि भगवान् श्रीरामको प्रतिमा प्राणप्रतिष्ठा भएको प्रथम वार्षिकोत्सवमा आज माईस्थान मन्दिरमा बिहान १० बजेदेखि हनुमान आराधना एवं सनातन वैलिक हवन पूजन एवं विशेष हवनका साथै साँझ एक लाख २५ हजार दीप प्रज्वलित गरेको थियो। प्रकाश उपाध्याय र मुना खनालले पूजाआजा गरी दीप प्रज्वलित गरेका थिए। कार्यक्रम नगर अध्यक्ष श्यामबाबू गुप्ताको अध्यक्षतामा भएको थियो।
