काठमाडौं, १७ फागुन/रासस
न्यूरोड टीम (एनआरटी) जावलाखेल युथ क्लबलाई पराजित गर्दै केपी ओली कप राष्ट्रिय फूटबल प्रतियोगिताको फाइनलमा प्रवेश गरेको छ । दशरथ रङ्गशालामा बिहीवार भएको खेलमा एनआरटीले जाउलाखेलमाथि ३–० गोलअन्तरको जीत निकाल्दै प्रतियोगिताको फाइनलमा पुगेको हो ।
एनआरटीको जीतमा सञ्जीव विष्टले दुर्ई गोल गरे भने विवेक गुरुङले एक गोल थपे । खेल शुरू भएको पाँच मिनेटमैं विवेकले गोल गर्दै एनआरटीलाई अग्रता दिलाए भने खेलको ५०औं मिनेटमा सञ्जीवले अर्काे गोल गरेर टोलीको अग्रतालाई अझ अघि बढाए । पहिलो गोल गरेको सात मिनेटपछि सञ्जीवले पुनः दोस्रो गोल गरे । त्यसपछि खेलमा कुनै गोल हुन सकेन र एनआरटीको जीत सुनिश्चित भयो ।
यसअघि एनआरटीले थ्री स्टारलाई १–० तथा जावलाखेलले आयोजक केपी ओली एफसीलाई २–१ ले पराजित गर्दै सेमिफाइनलमा प्रवेश गरेका छन् । प्रतियोगितामा विजयी हुने टोलीले रु ११ लाख तथा दोस्रो स्थान हासिल गर्ने टोलीले रु पाँच लाख नगद पुरस्कार प्राप्त गर्नेछन् ।
