जलेश्वर (महोत्तरी), २४ पुस/रासस
महोत्तरीको जलेश्वर–बर्दिवास सडकखण्डमा गए राति दुईवटा मोटरसाइकल एकापसमा ठक्कर खाँदा दुईजनाको मृत्यु भएको छ ।
मृत्यु हुनेमा रामगोपालपुर नगरपालिका, थलही बिर्ताका ३० वर्षीय मुकेश चमार र भङ्गहा नगरपालिका–३ का ३२ वर्षीय धमेन्द्र महतो रहेको जिल्ला प्रहरी कार्यालय, महोत्तरीका प्रवक्ता एवं प्रहरी नायब उपरीक्षक दिलीपकुमार गिरीले जानकारी दिए ।
दुर्घटनामा मोटरसाइकलको पछाडि सवार भङ्गहा–५ का ३१ वर्षीय श्रीराम गोसाईं र बर्दिवास नगरपालिका प्रेमनगरका ३६ वर्षीय प्रदीपकुमार यादव घाइते भएका छन् । उनीहरूको बर्दिवासस्थित शुभस्वस्तिक अस्पतालमा उपचार भइरहको छ । गए राति जलेश्वरबाट बर्दिवासतर्फ जाँदै गरेको ज.११प ८०९९ नम्बरको मोटरसाइकल र विपरीत दिशाबाट आउँदै गरेको प्र.२–०२–००४प १८४० नम्बरको मोटरसाइकल औरही नगरपालिका–१ स्थित वडा कार्यालय नजीकै ठोकिंदा दुवै मोटरसाइकलका चालकको मृत्यु भएको प्रनाउ गिरीले बताए ।
बाक्लो हुस्सुका कारण तीव्रगतिमा रहेका दुवै मोटरसाइकलका चालकले एकअर्कालाई नदेखेको र एक्कासि ठोकिएर दुर्घटना भएको प्रहरीले जनाएको छ ।
दुर्घटनापश्चात् गम्भीर घाइते दुवै चालकलाई उपचारका लागि शुभस्वस्तिक अस्पताल लगिएकामा उपचारका क्रममा उनीहरूको मृत्यु भएको थियो ।
