काठमाडौं, २५ असोज/रासस
विदेशी नागरिक नेपाल प्रवेश गर्ने पहिलो नाकाको रूपमा त्रिभुवन अन्तर्राष्ट्रिय विमानस्थल (टिआइए)लाई लिइन्छ । सात दशक लामो इतिहास बोकेको काठमाडौं विमानस्थल विदेशीलाई नेपालको झझल्को दिने ऐनाको रूपमा पनि हेरिन्छ । यो विमानस्थल भएर अहिले तीन नेपालीसहित २६ एयरलाइन्सले अन्तर्राष्ट्रिय उडान भरिरहेको टिआइएले जनाएको छ ।
कोभिड–१९ महामारीपूर्व काठमाडौं विमानस्थलमा ३१ अन्तर्राष्ट्रिय एयरलाइन्सले उडान गर्थे । आन्तरिकतर्फ पनि ११ हेलिकोप्टर कम्पनीसहित २० वायुसेवा प्रदायकले सेवा दिइरहेका छन् । विमानस्थलका महाप्रबन्धक प्रेमनाथ ठाकुरका अनुसार ‘स्लट’ व्यवस्थापन प्रभावकारी बनाइ उडान सुरक्षा र सेवा गुणस्तरमा ध्यान दिइएको छ ।
“विमानस्थलमा स्लट व्यवस्थापन प्रभावकारी ढङ्गले कार्यान्वयन गरिएको छ । अहिले जहाज ‘होल्ड’ र ‘डिले’ हुने अवस्था छैन । ‘सेफ्टी इन्ह्यान्स’ गरेका छौं । अहिले पर्यटकीय सिजनमा पनि विगतमा जस्तो दुईदेखि तीन घण्टा जहाज होल्ड र उडान डिले हुँदैन, मौसमले साथ दिएसम्म त्यस्तो कुनै समस्या छैन,” महाप्रबन्धक ठाकुरले भने ।
नेपालको राष्ट्रिय ध्वजावाहक नेपाल वायुसेवा निगम (नेपाल एयरलाइन्स), निजी लगानीको हिमालय एयरलाइन्स र बुद्ध एयर (भारतको बनारसमा)ले अन्तर्राष्ट्रियतर्फ उडान गरिरहेका छन् । भारतको एयर इन्डिया, इन्डिगो र भिस्ताराले काठमाडौं विमानस्थलमा उडान भर्दै आएका छन् । चीनको एयर चाइनाले मात्रै साताको एक उडान गरिरहेको छ । कोभिडपूर्व चीनका चार एयरलाइन्सले काठमाडौंमा उडान गर्थे । कोभिडपूर्व चीनको एयर चाइना, सिचुवान एयर, चाइना इस्ट्रन, चाइना साउदर्नले उडान गरेका थिए ।
नेपाल एयरलाइन्सले हाल भारतका तीनसहित आठ देशका १० गन्तव्यमा उडान भर्दै आएको छ । हिमालय एयरलाइन्सले विभिन्न छ देशका छ गन्तव्यमा उडान गर्छ । विमानस्थलको विवरणमा अहिले अन्तर्राष्ट्रियतर्फ दैनिक दुर्ईतर्फी ७५ देखि ८५ उडान भइरहेको छ । चाडपर्व र पर्यटकीय सिजन चलिरहेकाले अन्तर्राष्ट्रिय उडान सङ्ख्या बढेको विमानस्थलले जनाएको छ । आन्तरिकतर्फ अहिले दुर्ईतर्फी ३१० उडान चलिरहेको छ ।
तत्कालका लागि थप अन्तर्राष्ट्रिय एयरलाइन्स सम्पर्कमा नआएको नेपाल नागरिक उड्डयन प्राधिकरणका प्रवक्ता जगन्नाथ निरौलाले बताए । गौतमबुद्ध अन्तर्राष्ट्रिय विमानस्थलमा हङ्गेरीको बिज एयरले आगामी अक्टोबर ३० देखि युएईको अबुधाबी उडान गर्ने अनुमति पाएको छ । नोभेम्बर १५ तारिखबाट विन्टर सेड्रल आउने र त्यसमा गौतमबुद्ध विमानस्थललाई केन्द्रित गरिएको प्रवक्ता निरौलाले जानकारी दिए । हिमालय एयरलाइन्स, एयर अरेबिया र फ्लाई दुबईले उडान भर्ने चासो देखाएका छन् ।
गौतमबुद्ध विमानस्थलमा अहिले कुवेतको जजीरा एयरले दैनिक एक उडान गरिरहेको छ ।
महामारीपछि पर्यटन क्षेत्र चलायमान बन्दै गएको छ । पर्यटकीय सिजन पनि शुरू भएको छ । दशैं सकिएर तिहार र छठपर्वको सङ्घारमा रहेकाले अहिले अन्तर्राष्ट्रिय आन्तरिक उडान चाप बढेको छ । हवाईयात्रीको सङ्ख्या पनि बढ्दो क्रममा रहेको विमानस्थल कार्यालयले जनाएको छ । आन्तरिक यात्रीले एयरलाइन्सको ‘बिजनेश’ बढाएको छ । चाडपर्वसँगै भ्रमणमा निस्कने यात्रीको सङ्ख्या बाक्लिएको छ ।
यी एयरलाइन्सको अन्तर्राष्ट्रिय उडान
प्राधिकरणका अनुसार टिआइएबाट अहिले २६ एयरलाइन्सले अन्तर्राष्ट्रिय उडान गरिरहेका छन् । नेपालको नेपाल एयरलाइन्स, हिमालय एयरलाइन्स र बुद्ध एयरले उडान गरिरहेका छन् ।
त्यस्तै, एयर अरेबिया अबुधाबी र एयर अरेबिया शारजाहले उडान भर्दै आएका छन् । जजीरा एयर, कोरियन एयर, मालिन्दो एयर, मलेशिया एयर, कतार एयरवेज, सलाम एयर, सिङ्गापुर एयर, श्रीलङ्कन एयरलाइन्स, टर्किश एयरलाइन्सले उडान भरिरहेका छन् । विमान बङ्गलादेश, क्याथी प्यासिफिक एयरवेज लिमिटेड, डु«क एयरलाइन्स र फ्लाई दुबईले काठमाडौं विमानस्थल भएर उडान गरिरहेका छन् ।
विमानस्थलमा पछिल्लोपटक थाई स्माइल एयर, भिस्तारा र श्रीलङ्कन एयरलाइन्सले उडान भर्दै आएका छन् । गौतमबुद्ध विमानस्थलबाट कुवेतको जजीरा एयरले उडान गरिरहेको छ । नेपालले हाल ४० मुलुक र युरोपेली सङ्घ गरी ४१ मुलुकसँग हवाई सेवा सम्झौता गरिसकेको छ । पछिल्लोपटक सन् २०१९ मा अस्ट्रेलियासँग हवाई सेवा सम्झौता भएको थियो । छिट्टै अमेरिका, स्वीट्जरल्यान्ड, इन्डोनेशिया, रुवान्डालगायत मुलुकसँग हवाई सम्झौता हुने जनाइएको छ ।
