वाशिङ्टन, २५ भदौ/एएफपी/सिन्ह्वा
अमेरिकी राष्ट्रपति जो बाइडेन र चिनियाँ राष्ट्रपति सी जिनपिङबीच टेलिफोन वार्ता भएको एएफपी समाचार समितिले शुक्रवार जानकारी दिएको छ । उनप्हरूका बीचमा सात महीनापछि बिहीवार पहिलोपटक कुराकानी भएको अमेरिकी राष्ट्रपतिको कार्यालय ह्वाइट हाउसले जनाएको छ।
बाइडेन अमेरिकी राष्ट्रपतिमा निर्वाचित भएदेखि उनीहरूबीच यो दोस्रोपटक वार्ता भएको हो । यसअघि उनीहरूबीच बाइडेन निर्वाचित भएलगत्तै पहिलोपटक कुराकानी भएको थियो । झन्डै ९० मिनेटको टेलिफोन संवाद आपसी सम्बन्ध सुधार र अस्पष्टता न्यूनीकरणमा केन्द्रित भएको ह्वाइट हाउसले जनाएको छ ।
अहिले भएको कुराकानीका क्रममा उनीहरूले आपसी द्वन्द्व न्यूनीकरण गर्दै अन्तर्राष्ट्रिय मामिलामा मिलेर काम गर्नेबारेमा छलफल गरेका बताइएको छ । वार्ताका क्रममा चिनियाँ राष्ट्रपति जिनपिङले सम्बन्ध सुदृढीकरणका लागि अमेरिकासँग आग्रह गरेका सिन्ह्वा समाचार समितिले जानकारी दिएको छ ।
उनले दुवै देशका नागरिकको हित र आपसी हितका लागि पनि चीन र अमेरिकाको सम्बन्ध सही दिशामा हुनुपर्नेमा जोड दिएका थिए । दुर्ई देशले आपसमा अझ बढी जिम्मेवारी महसूस गर्दै विगतमा जस्तै सही दिशामा सम्बन्ध विस्तार गर्नका लागि जिम्मेवार ढङ्गले लाग्न र आपसी समझदारी र समन्वयका साथ अघि बढ्नुपर्ने चिनियाँ राष्ट्रपति जिनपिङले बताएका छन्।
ह्वाइट हाउस र बेइजिड्ढा बीचमा कतिपय गलत बुझाइ, भ्रम र अस्पष्टता रहेकाले खुलेर छलफल गर्दै एकअर्काबीचको अस्पष्टतालाई न्यूनीकरण गर्नुपर्नेमा समेत उनीहरूले कुराकानी गरेका थिए। कतिपय गम्भीर मतभिन्नताका बीचमा पनि नयाँ शिराबाट आसपी सम्बन्धलाई अगाडि बढाउनुपर्ने कुरामा चिनियाँ राष्ट्रपति सीले जोड दिएका थिए ।
तत्कालीन राष्ट्रपति डोनाल्ड ट्रम्पको व्यवहार र शैलीकै आधारमा अमेरिकाको नयाँ सरकारलाई पनि हेर्न नहुनेमा अमेरिकी पक्षको जोड थियो । ट्रम्पको कार्यकालमा चीनसँग अमेरिकाको सम्बन्ध नराम्रोसँग बिग्रिएको थियो । विश्वका पहिलो र दोस्रो शक्तिशाली राष्ट्र मानिने अमेरिका र चीनबीचको द्वन्द्वले विश्वलाई नै चिन्तित बनाएको थियो । तर पछि द्वन्द्व मत्थर भएपनि सम्बन्ध सुधार भने भएको थिएन ।
दुई समकक्षीबीचको अहिलेको वार्ताले अमेरिका र चीनबीचको सम्बन्ध सुधारमा योगदान पुग्ने अपेक्षा गरिएको छ । उनीहरूका बीचमा आपसी सम्बन्ध सुधारसँगै व्यापार, गुप्तचरी, महामारीलगायतका विषयमा पनि छलफल भएको जनाइएको छ । अमेरिकाले कोरोना भाइरसलाई चिनियाँ भाइरसको संज्ञासमेत दिएकाले पनि अमेरिका र चीनका बीचमा सम्बन्ध थप बिग्रिएको थियो । त्यसपछि बाइडेन सरकार र चिनियाँ पक्षले एकअर्काप्रति चर्काे टिप्पणी गरेका थिए ।
चिनियाँ अधिकारीहरूले अमेरिकाले अरू देशलाई चीनमाथि आक्रमण गर्न उक्साएको आरोप लगाएका थिए भने अमेरिकाले चीनको ध्यान तान्ने उद्देश्यसहित आएको टिप्पणी गरेको थियो । विशाल अर्थतन्त्र भएका दुई देशबीच केही ठूला विषयमा ठूलै मतभेद रहेका छन् । सबैभन्दा बढी मतभेद मानव अधिकार र लोकतन्त्रको विषयमा रहेको प्रस्टै देखिन्छ ।
त्यसैगरी, व्यापारको विषयमा पनि अमेरिका र चीनका बीचमा ठूलो विवाद रहेको छ । डोनाल्ड ट्रम्पको कार्यकालमा त दुर्ई देशबीच व्यापारयुद्ध नै चलेको थियो ।
त्यो युद्ध अहिले युद्धकै अवस्थामा नरहे पनि विवादको प्रमुख विषय भने बनेकै छ । अमेरिकाले चिनियाँ सामानमा ३६० अर्ब डलरभन्दा बढी कर लगाइदिएको थियो भने प्रतिक्रियास्वरूप चीनले पनि अमेरिकी सामानमा ११० अर्ब डलर कर लगाइदिएको थियो ।
त्यसैगरी, बाइडेनले आफ्ना पूर्ववर्तीले चीनविरुद्ध लागू गरेका कडाइ हटाएका छैनन् भने चीन अझै अमेरिकासँग असन्तुष्ट छ । दुई देशबीच अफगानिस्तानको विषयमा पनि तनाव देखिएको छ । बिहीवारको फोनवार्तामा अमेरिकाले चीनविरुद्ध लागू गरेका कडाइ हटाउने र अफगानिस्तानको विषयलाई लिएर एकअर्काको विरुद्धमा नलाग्ने बारेमा समेत छलफल भएको जनाइएको छ । रासस
