प्रस, वीरगंज, २६ पुस/
मधेस प्रदेशको राजधानी जनकपुर र आर्थिक राजधानी वीरगंजमा जारी जय ट्रफी अन्तर्गतको मिनी टेस्ट प्रतियोगिता अन्तर्गत शनिवारदेखि तेस्रो चरणको दुई दिवसीय खेल शुरू हुँदैछ ।
तीनवटा दुई दिवसीय र फाइनल तीन दिवसीय मिनी टेस्टमा अहिलेसम्म दुईवटा खेल सम्पन्न भएका छन् । अहिलेसम्म भएका खेलमा अङ्कतालिकाको आधारमा विभागीय टीम नेपाल पुलिस क्लब अग्रस्थानमा छ भने अर्को विभागीय टीम त्रिभुवन आर्मी दोस्रो स्थानमा छ । तेस्रोमा बाग्मती र चौथोमा मधेस प्रदेश छन् ।
चारवटा टीम सहभागी जय शाह ट्रफी अन्तर्गत शनिवार तेस्रो चरणको खेल हुने आयोजक कमिटीले जनाएको छ । शनिवार र आइतवार दुई दिवसीय खेलमा नारायणी क्रिकेट मैदानमा विभागीय टीम नेपाल पुलिस र मधेस प्रदेश भिड्ने छन् भने जनकपुरमा विभाागीय टीम त्रिभुवन आर्मी र बाग्मती प्रदेश भिड्नेछन् ।
सोमवार विश्रामपछि मङ्गलवारदेखि बिहीवारसम्म त्रिदिवसीय फाइनल खेल हुनेछ । दुई दिवसीय खेल सम्पन्न भएपछि त्यसबाट अङ्कतालिकाको आधारमा उत्कृष्ट दुई टीम फाइनलमा खेल्ने आयोजकले जनाएको छ ।
