प्रस, वीरगंज, १५ पुस/
तिलगङ्गा आँखा प्रतिष्ठान काठमाडौंको चिकित्सक टोलीमाथि पर्सागढी नगरपालिका–३ झबराहास्थित इन्दु रिसोर्टमा शनिवार राति भएको दुव्र्यवहारमा संलग्न छजनालाई पर्सा प्रहरीले पक्राउ गरेको छ ।
पर्सागढीमा सञ्चालित आँखा शिविरका लागि तिलगङ्गा आँखा अस्पतालको चिकित्सक टोली तीन दिनदेखि सो रिसोर्टमा बसेको थियो । शनिवारका दिन सो रिसोर्टमा वीरगंजबाट गएका युवाहरूको टोलीले चर्को स्वरमा साङ्गीतिक कार्यक्रम सञ्चालन गरेका थिए । जसले गर्दा चिकित्सकहरूलाई सुत्ने क्रममा असहज भएको थियो । उनीहरूले आवाज कम गर्न आग्रह गरेको र सोही क्रममा मदिरा सेवन गरेका युवाहरूले गालीगलौज र कुटपिट गरेका थिए ।
कुटपिटमा विदेशी चिकित्सक सिङ्गापुर निवासी ३५ वर्षीय वाङ स्टिनको खुट्टामा सामान्य चोट लागेको छ । यसैगरी, ३६ वर्षीय नवीन सापकोटाको आँखा र गालामा चोट लागेको छ ।
घटनामा संलग्न वीरगंज महानगर–१० का २४ वर्षीय अभिषेक गुप्ता, २७ वर्षीय सार्थक सर्राफ, २४ वर्षीय रोहित साह, २७ वर्षीय विजय रञ्जन, २९ वर्षीय सुमन श्रीवास्तव र २४ वर्षीय विधान कर्णलाई प्रहरीले पक्राउ गरेको छ । उनीहरूलाई आइतवार पक्राउ गरिएको र अदालतबाट पाँच दिनको थुना आदेश लिएर थप कारबाई अगाडि बढाइएको पर्सा प्रहरीले जनाएको छ ।
