प्रस, परवानीपुर, ६ मङ्सिर/
वीरगंजका राष्ट्रिय क्रिकेट खेलाडीहरूलाई सम्मानित गरिएको छ । वीरगंज स्किन हेयर एन्ड लेजर सेन्टरले बिहीवार दुईजना क्रिकेटर र स्थानीय प्रशिक्षकहरूलाई सम्मान गरेको हो ।
नेपाली पुरुष राष्ट्रिय क्रिकेट टोलीका ओपनिङ ब्याट्सम्यान आशिफ शेख र महिला यू–१९ टोलीकी सदस्य साना पवीनलाई सेन्टरले पुष्प गुच्छा र खादा ओढाएर सम्मान गरेको हो । त्यस्तै, मधेस प्रदेशका यू–१९ का खेलाडी अनुज चौहान, वीरगंजकी स्थानीय महिला क्रिकेटर शिवानी साहलाई समेत सम्मानित गरिएको थियो ।
सोही अवसरमा आशिफ शेखका वीरगंजका स्थानीय प्रशिक्षक जहुर अन्सारी, साना परवीनकी प्रशिक्षक रमिज राजा अन्सारीलाई पनि सम्मानित गरिएको सेन्टरका सञ्चालक कृष्ण झाले बताए । राष्ट्रियस्तरमा खेलको माध्यमबाट वीरगंजलाई चिनाउने खेलाडीहरूको हौसला र मनोबल बढाउन सम्मानित गरिएको उनले बताए ।
उनले ती खेलाडीहरूको छालासम्बन्धी उपचार निश्शुल्क दिने घोषणासमेत गरेका छन् । कार्यक्रममा डा आरपी जायसवाल, डा स्वाती साहलगायतको सहभागिता थियो ।
