प्रस, पोखरिया, ३० कात्तिक/
जीराभवानी गाउँपालिका–२ सेढवामा शुक्रवारदेखि दुई दिने सर्वोदय कप–२०८१ शुरू भएको छ । टिच फर नेपालको सहयोग र मावि सेढवाको व्यवस्थापनमा शुक्रवारदेखि शुरू भएको छात्र तथा छात्रा फूटबल प्रतियोगिताको गापाध्यक्ष अनोज चौधरीले उद्घाटन गरेका थिए ।
प्रतियोगितामा जीराभवानी गापाको सेढवा मावि, ठोरी गापाको ज्ञानवाटिका मावि, सुवर्णपुर र विजयबस्ती मावि, पटेर्वासुगौली गापाको निचुटा मावि र सखुवाप्रसौनी गापाको दीपनारायण मावि तथा औराहा पंचगावाँका पाँचवटा विद्यालयका छात्र र छात्रा प्रतियोगितामा सहभागी छन् । आज भएको छात्रतर्फको पहिलो खेलमा सेढवा माविले ज्ञानवाटिका मावि सुर्वणपुरलाई एकका विरुद्ध दुई गोल गरी विजयी भयो ।
यसैगरी, छात्रातर्फको पहिलो खेलमा निचुटा मावि र ज्ञानवाटिका मावि सुवर्णपुर बराबरीमा खेलेका थिए । छात्रातर्फको दोस्रो खेलमा सेढवा माविले विजयबस्ती माविलाई शून्यका विरुद्ध दुई गोलले पराजित ग¥यो । प्रतियोगिता भोलिसम्म सञ्चालन हुने सेढवा माविका प्रधानाध्यापक खेमराज महतोले बताए ।
