नरेश यादव, पर्सागढी, २९ कात्तिक/
पर्सागढी नगरपालिका–३ स्थित मिनी रङ्गशालामा जारी प्रथम बिरुवागुठी नकआउट फूटबल प्रतियोगिताको दोस्रो सेमिफाइनलमा आयोजक बिरुवागुठी युथ क्लब बडनिहार विजयी भई फाइनलमा प्रवेश गरेको छ ।
बिरुवागुठी युथ क्लबद्वारा आयोजित प्रतियागिताको दोस्रो सेमिफाइनलमा आज बिरुवागुठी युथ क्लबले पर्सागढी नपा–३ कै नमोबुद्ध युवा क्लब झबराहालाई शून्यका विरुद्ध एक गोलअन्तरले पराजित गर्दै फाइनलको यात्रा सुरक्षित गरेको हो । आज भएको खेलमा मध्यान्तर अघि दुवै टीमले गोलरहित खेलेका थिए । मध्यान्तरपछिको अन्तिम समयमा बिरुवागुठीका आकाश राणाले गरेको एक गोल नै खेलको निर्णायक भएको थियो । आजको खेलको ‘म्यान अफ दी म्याच’ बिरुवागुठीका राकेश चौधरी घोषित भए । उनलाई स्थानीय समाजसेवी राजु विश्वकर्माले नगद, शिल्ड र प्रमाणपत्र प्रदान गरेका थिए । प्रतियोगिताको फाइनल खेल शनिवार हुने आयोजक कमिटीका सूचना प्रमुख कृष्णप्रसाद शर्माले बताए । आजको विजेता आयोजक बिरुवागुठी युथ क्लब, बडनिहार र हिजोको विजेता सिमरा युनाइटेड क्लबबीच फाइनल खेल हुने सूचना प्रमुख शर्माले जानकारी गराएका छन् ।
