प्रस, रौतहट, २७ कात्तिक/
पोखराबाट जनकपुरतर्फ जाँदै गरेको यात्रुवाहक बस मङ्गलवार बिहान चन्द्रनिगाहपुरमा दुर्घटना हुँदा १२ जना घाइते भएका छन् ।
पूर्व–पश्चिम राजमार्ग अन्तर्गत चन्द्रपुर नगरपालिका–२ लचकामा स्यालले बाटो काट्न खोज्दा त्यसलाई बचाउने क्रममा ग.१ख ५८०७ नम्बरको बस दुर्घटना भएको प्रहरीले जनाएको छ ।
बसमा यात्रा गरिरहेका २० जना यात्रुमध्ये १२ जना घाइते भएका र सोमध्ये एकजनाको अवस्था गम्भीर रहेको जिल्ला प्रहरी कार्यालय, रौतहटका प्रवक्ता एवं प्रहरी नायब उपरीक्षक दीपक रायले बताए ।
बसचालक ३५ वर्षीय पदमबहादुर बस्नेत र सहचालक ३० वर्षीय सुरज पौडेललाई प्रहरी चोकी पौराईले नियन्त्रणमा राखेको उनले बताए ।
यसैबीच, आजै चन्द्रपुर नगरपालिका–४ मा मोटरसाइकल दुर्घटना हुँदा चालकको मृत्यु भएको छ ।
सर्लाहीबाट निजगढतर्फ जाँदै गरेको प्रदेश २–०२–००४ प ७०४९ नम्बरको मोटरसाइकल अनियन्त्रित भई सडकमा लडेर दुर्घटना हुँदा सर्लाही जिल्ला पर्सा गाउँपालिका–६ का २७ वर्षीय साजिद अन्सारीको मृत्यु भएको इलाका प्रहरी कार्यालय चन्द्रपुरले जनाएको छ । दुर्घटनामा घाइते अन्सारीलाई उपचारका लागि चन्द्रपुर अस्पतालमा लैजाने क्रममा बाटोमैं मृत्यु भएको प्रहरीले जनाएको छ ।
