प्रस, मकवानपुर, १९ साउन/ काठमाडौंबाट वीरगंजको लागि आइरहेको यात्रुवाहक सुमो मकवानपुरको सिस्नेरीमा पल्टिंदा १० जना घाइते भएका छन्।
कुलेखानी–सिस्नेरी सडकखण्ड अन्तर्गत इन्द्रसरोवर गाउँपालिका वडा नं ३ सिस्नेरीमा शनिवार बिहान सुमो पल्टिएको थियो। सुमो अनियन्त्रित भई पल्टिएको जिल्ला प्रहरी कार्यालय, मकवानपुरको प्रारम्भिक अनुमान छ।
शनिवार बिहान करीब ७ः२० बजे मधेस प्रदेश ०३–००१ ज ०३६२ नम्बरको सुमो आफैं अनियन्त्रित भई सडकको नाला साइडमा पल्टिएको प्रहरीले जनाएको छ। उक्त सडक दुर्घटनामा सुमोका चालकसहित सवार १० जना घाइते भएका छन्।
घाइतेमध्ये तीनजना गम्भीर र सातजनाको अवस्था मध्यम रहेको उद्धारमा सहभागी स्थानीयले बताएका छन्। उनीहरूलाई स्थानीयस्तरमा उपचार सम्भव नभएकोले काठमाडौंतर्फ पठाएको प्रहरीले जनाएको छ।
