प्रस, सिम्रौनगढ, ८ साउन/
सिम्रौनगढ नगरपालिका–६ निवासी रामजन्मप्रसाद कुशवाहाको घरमा लुटपाट भएको छ ।
सिम्रौनगढ बजारदेखि उत्तरतर्फ रहेको सानो इँटवालमा करीब सयजनाको समूहमा आएका मानिसहरूले कुशवाहाको घरमा तोडफोड गर्दै लुटपाट गरेका थिए । सो समूहले कुशवाहाले घरमा रहेको ट्याक्टरको हेड लाइट, दुईवटा मोटरसाइकल पनि तोडफोड गरेको छ । भीडले घरमा रहेका सामानहरू तोडफोड गर्नुका साथै कुशवाहाकी पत्नीले लगाएको गहना पनि लुटेको छ ।
एक दिन अघि बेलुकीपख सिम्रौनगढ नपा–५ सानो इँटवाल निवासी राजकिशोर पटेलले मन्दिर क्षेत्रमा पिसाब गर्दा कुशवाहाका छोरा रामप्रवेश कुशवाहाले रोक्न खोज्दा विवाद भएको थियो । यो विवादका बीच रामप्रवेश र निजका साथीहरूले पटेललाई कुटपिट गरेका थिए । यसअघि पनि रामप्रवेश र निजका साथीहरूले इँटवाल टोलका युवकहरूलाई कुटपिट गरेका थिए ।
सोही कुटपिटको बदला लिन सोमवार इँटवालबाट सयौंको सङ्ख्यामा मानिसहरू आएर कुशवाहाको घरमा तोडफोड, लुटपाट गरेको बताइन्छ । घटनापछि कुशवाहाको घरमा जनपद र सशस्त्र प्रहरी परिचालन गरेर सुरक्षा प्रदान गरिएको छ ।
