काठमाडौं, २ जेठ/रासस
ललितपुर मेयर्स कप क्रिकेट–२०८१ अन्तर्गत बुधवार भएको खेलमा सशस्त्र प्रहरी बलको (एपिएफ) क्लब आयोजक ललितपुर मेयर्स–११ लाई पराजित गर्दै प्रतियोगिताको फाइनलमा पुगेको छ ।
कीर्तिपुरस्थित त्रिभुवन विश्वविद्यालय क्रिकेट मैदानमा सम्पन्न खेलमा ललितपुरलाई आठ विकेटले पराजित गर्दै एफिएफ एक खेलअगावै प्रतियोगिताको फाइनलमा पुगेको हो । एपिएफले तीन खेलमा छ अङ्क बटुलेको छ । त्यस्तै, सुदूरपश्चिमको दुर्ई खेलमा चार अङ्क रहेको छ । यता ललितपुरको तीन खेलमा दुर्ई अङ्क रहेको छ भने समान दुई/दुई खेल खेलेका कोशी र बाग्मती प्रदेश अङ्कविहीन छन् ।
आजको खेलमा ललितपुरले दिएको ७२ रनको लक्ष्य एपिएफले नौ दशमलव पाँच ओभरमा दुई विकेट गुमाउँदै पूरा गर्यो । एपिएफका लागि कप्तान सीता रानामगरले सर्वाधिक ५० रनको योगदान दिइन् । उनले ३५ बलमा आठ चौकासहित ५० रन बनाएकी हुन् ।
त्यस्तै, ममता चौधरीले २१ बलमा एक चौकासहित १६ रन बनाइन् भने इन्दु बर्मा र रोमा थापा समान एक/एक रनमा अविजित रहे ।
ललितपुरका लागि कृतिका मरासिनीले दुई विकेट लिइन् । त्यसअघि टस जितेर पहिला ब्याटिङ गरेको ललितपुरले निर्धारित २० ओभरमा पाँच विकेट गुमाएर ७१ रनको योगफल बनाएको थियो । कप्तान पूजा महतोले सर्वाधिक २४ रन बनाइन् । उनले ३९ बलमा एक चौकासहित २४ रन बनाइन् । त्यस्तै, ज्योत्स्निका मरासिनीले ३९ बलमा एक चौका प्रहार गर्दै २१ रन जोडिन् ।
एपिएफका लागि रेखा रावल र कप्तान सीता रानामगरले समान एक/एक विकेट लिए । विभिन्न पाँच टोली सहभागी उक्त प्रतियोगिता सिङ्गल राउन्ड रोबिनका आधारमा हुँदैछ । लिग चरणका शीर्ष दुई टोलीले उपाधिका लागि प्रतिस्पर्धा गर्नेछन् ।
