प्रस, वीरगंज, ८ वैशाख/
मानव बेचबिखन विरोधी एकाइ बेतियाको रक्सौलस्थित एकाइले शनिवार एकजना भारतीय किशोरीको उद्धार गरेको छ ।
बेतिया निवासी १७ वर्षीया किशोरीको उद्धार गरेको र निजलाई ललाइफकाइ नेपाल ल्याउने कार्यमा संलग्न युवक समीर आलमलाई पक्राउ गरेको इन्स्पेक्टर मनोज शर्माले बताए ।
उनले किशोरीलाई नेपाल लैजान लागेको सूचनाको आधारमा समीर आलमलाई किशोरीलाई नेपाल ल्याउने क्रममा पक्राउ गरिएको बताए । दुई महीनादेखि किशोरीलाई पिछा गरेर प्रेमजालमा फसाएका समीरले आज नेपाल ल्याउन लाग्दा उनलाई पक्राउ गरी बालविवाह अन्तर्गत मुद्दा चलाइएको इन्स्पेक्टर शर्माले बताए । किशोरीकी साथी सलमा खातुनको बिहेमा समीरले किशोरीसँग सम्बन्ध बढाउन खोजेको र दुई महीनाको प्रयासमा उनले नाबालिकालाई प्रेमजालमा फसाउन सफल भएपछि उनीसँग बिहे गर्ने भनेर नेपाल ल्याउन खोजेको इन्स्पेक्टर शर्माले उद्धृत गर्दै बताए ।
