प्रस, वीरगंज, ११ फागुन/
वडा प्रहरी कार्यालय, श्रीपुरले शुक्रवार वीरगंज महानगर–१२ स्थित क्षीरसागरदेखि दक्षिणतर्फ मेनरोडमा रहेको मिटिङ हाउसमा छापा मारी १३ जना जुवाडेलाई पक्राउ गरेको छ ।
सूचनाको आधारमा प्रहरीले मिटिङ हाउसमा छापामारी गरेको वडा प्रहरी कार्यालय, श्रीपुरले जनाएको छ । सो ठाउँबाट प्रहरीले १३ जना जुवाडेसहित ६५ हजार रुपैयाँ बरामद गरेको जनाइएको छ । जिल्ला प्रहरी कार्यालय, पर्साका प्रवक्ता कुमार विक्रम थापाले होटलमा छापामारी गरेको र जुवाडेहरू पक्राउ परेको पुष्टि गरेका छन् ।
खाजा खाने होटेलमा तास खेलिरहेका व्यक्तिसँगै खाजा खाने व्यक्ति पनि पक्राउ परेकामा सो विषयमा अनुसन्धान भइरहेको उनले बताए । होटल सञ्चालकसहित १३ जनालाई प्रहरीले पक्राउ गरेको जनाएको छ ।
सो होटलमा जुवा, तास हुने गरेको र यसबारेमा वडा प्रहरी कार्यलय श्रीपुर, जिल्ला प्रहरी कार्यालय पर्सामा जानकारी गराए पनि सुनवाइ नभएको स्थानीयको गुनासो छ । प्रहरी उपरीक्षक परिवर्तन भएपछि काम देखाउनका लागि शुक्रवार जुवाडेहरूलाई पक्राउ गरिएको स्रोतले जनाएको छ । जुवाडेहरूबाट १४ थान मोबाइल पनि बरामद भएको छ ।
वडा प्रहरी कार्यालय श्रीपुरका प्रहरी निरीक्षक धर्मजङ्ग थिङले पक्राउ परेका व्यक्ति तथा बरामद रकम जिल्ला प्रहरी कार्यालयमा बुझाएको बताए ।
