प्रस, वीरगंज, ३ फागुन/
जिल्ला प्रहरी कार्यालय बाराले करीब ३५ किलो चरेससहित दुईजनालाई पक्राउ गरेको जनाएको छ ।
जिप्रका, बारा अन्तर्गतको इलाका प्रहरी कार्यालय, अमलेखगंजले हिजो करीब ३५ किलो चरेससहित दुईजना भारतीय नागरिक पक्राउ गरेको बारा प्रहरीका सूचना अधिकारी एवं प्रहरी निरीक्षक वीरेन्द्र गुरुङले बताए । उनले हेटौंडाबाट वीरगंजतर्फ आइरहेको भारतीय नम्बर प्लेटको कारमा लुकाइएको सो चरेस बरामद भएको बताए । चरेस बरामद भएपछि चालक भारत, उत्तर प्रदेश निवासी ४२ वर्षीय साजिर अलि र ४५ वर्षीय मोहमद अफजललाई पक्राउ गरेर अदालतबाट पाँच दिनको म्याद थप गरी अनुसन्धान भइरहेको बताए ।
अपहरण मुद्दामा फरार गोसाईं पक्राउ
जिल्ला प्रहरी कार्यालय, बाराले अपहरण र शरीर बन्धक मुद्दामा फरार एकजनालाई पक्राउ गरेको छ । बारा जिल्ला अदालत, कलैयामा अपहरण र शरीर बन्धक मुद्दा दायर भएपछि फरार रहेका प्रसौनी गापा–१ का ४५ वर्षीय राजकुमार गोसाईंलाई पक्राउ गरिएको बारा प्रहरीका प्रवक्ता एवं प्रहरी निरीक्षक वीरेन्द्र गुरुङले बताए ।
