प्रस, सेढवा, ९ मङ्सिर/
पर्साको जगरनाथपुर गाउँपालिकामा जारी दोस्रो अध्यक्ष क्रिकेट कप प्रतियोगिताको उपाधि वडा नं ५ ले जितेको छ। मसिहानीस्थित खेलमैदानमा सम्पन्न फाइनल खेलमा वडा नं ५ ले तीन विकेटअन्तरले जीत निकाल्दै प्रतियोगिताको उपाधि जितेको हो। वडा नं ६ लाई पराजित गर्दै वडा नं ५ विजयी भएको हो। विजेता भएसँगै वडा नं ५ ले ६० हजार नगद प्राप्त गरेको छ। निर्धारित २० ओभरको खेलमा पहिले ब्याटिङ गर्दै वडा नं ६ ले १८ ओभरमा सबै विकेट गुमाउँदै ७९ रन बनाएको थियो। ८० रनको लक्ष्य लिई ब्याटिङ गरेको वडा नं ५ ले ११ बल बाँकी रहँदै ७७ रन जोडेको थियो। खेलको १९औं ओभरको पहिलो बलमा रन आउट माग गरिएकोमा अम्पायरले नदिंदा वडा नं ६ का खेलाडीहरूले खेलमैदान छोडेका थिए।
वडा नं ५ ले सात विकेटको क्षतिमा ७७ रन बनाइसकेको र विपक्षी टीमले मैदान बहिष्कार गरी अनुशासनहीन काम गरेको भन्दै आयोजकको निर्णायक टोलीले वडा नं ५ को टीमलाई विजेता घोषित गरेको थियो। विजेतालाई ट्रफी र नगद हस्तान्तरण गरिएको थियो। गाउँपालिका अध्यक्ष श्रीकान्त यादवको अध्यक्षतामा सम्पन्न कार्यक्रममा नेपाली काङ्ग्रेस पर्साका सभापति एवं प्रदेश सांसद जनार्दनसिंह क्षत्रीले विजेता टीमलाई पुरस्कार वितरण गरेका थिए।
