प्रस, वीरगंज, १६ भदौ/
पर्साका दुई स्थान र बाराको एक स्थान गरी शनिवार सम्पन्न तीन ठाउँका रक्तदान कार्यक्रममा १२ जना महिलासहित १५४ जनाले रक्तदान गरेको रक्त सञ्चार केन्द्र वीरगंजका प्राविधिक प्रमुख सौरभराज पाण्डेले बताए ।
नेपालका लागि नेपाली पार्टी, पर्साद्वारा वीरगंजको घण्टाघरमा आयोजित रक्तदान कार्यक्रममा ७० जनाले रक्तदान गरेका प्राविधिक प्रमुख पाण्डेले बताए ।
जिल्ला अध्यक्ष अनिल कुर्मीको अध्यक्षतामा भएको कार्यक्रममा केन्द्रीय अध्यक्ष सन्तोष पटेलले रक्तदान गरेर शुभारम्भ गरेका थिए । कार्यक्रममा राकेश साह, अग्निप्रसाद भुसाल, राजाबाबू चौरसिया, प्रणय सिन्हा, अनिल कुर्मी, आनन्द सिंह, रोहित पटेल, धीरेन्द्र यादव, सुवास पटेल, रामबाबू अधिकारी, महमद रियाजलगायतले रक्तदान गरेका थिए ।
यसैगरी, नेपाल सितेरियो कराँते सङ्घ, पर्साले वीरगंजमा आयोजना गरेको रक्तदान कार्यक्रममा दुईजना महिलासहित २२ जनाले रक्तदान गरेको प्राविधिक प्रमुख पाण्डेले बताए ।
त्यसैगरी, बाराको निजगढमा लायन्स क्लब अफ निजगढले आयोजना गरेको रक्तदान कार्यक्रममा १० जना महिलासहित ६२ जनाले रक्तदान गरेको रक्तसञ्चार केन्द्रका प्राविधिक जीतेन्द्र कुशवाहाले बताए । हनुमानचोकमा आयोजित कार्यक्रममा पवितु काफ्ले, पार्वती लामा, मनमाया श्रेष्ठ, नीरज कटुवाल, निरञ्जन रिसाल, सुरज गौतम, दिलीप यादवलगायतले रक्तदान गरेका थिए ।
