प्रस, पर्सागढी, २९ वैशाख/
प्रहरी चौकी मिलनचोकले करीब २० क्विन्टल छडसहित एकजना स्थानीयलाई पक्राउ गरी आवश्यक कारबाईको लागि जिल्ला प्रहरी कार्यालय, पर्सामा पठाएको छ ।
वीरगंज महानगर–३१ बेलवा–मुसौली खण्डको बीचमा पर्ने भेडाहा खोलाको पुल छ वर्षअघि निर्माणको क्रममा पप्पु/समा कन्स्ट्रक्शनका चौकीदार ५५ वर्षीय हबिब मियाँ अन्सारीले करीब २० क्विन्टल छड चोरेर आफ्नो खेतमा माटो खनी गाडेर लुकाएका थिए । सो छड बिहीवार राति ८ बजे स्थानीयले देखेर प्रहरीलाई खबर गरेका थिए । मियाँले आफ्नो भतिजामार्फत रातिको समयमा खेतमा लुकाएको छड माटो खनेर निकाल्ने क्रममा सो दृश्य देखेका स्थानीयले प्रहरीलाई खबर गरेका थिए । प्रहरीले मियाँको खेतबाट करीब २० क्विन्टल (एक ट्याक्टर) छड बरामद गरेर मियाँलाई पनि पक्राउ गरेको र आवश्यक कारबाईको लागि जिल्ला प्रहरी कार्यालय, पर्सामा पठाएको प्रहरी चौकी मिलनचोकले जनाएको छ ।
