प्रस, वीरगंज, ९ वैशाख/
साहित्य सङ्गम मकवानपुरले प्रतीक दैनिकका स्तम्भकार एवं साहित्यकार पत्रकार सञ्जय साह मित्रलाई शनिवार भैरव अर्याल स्मृति सम्मान २०७९ पुरस्कार प्रदान गरेको छ ।
साहित्य सङ्गमकी अध्यक्ष अनीता न्यौपानेको अध्यक्षतामा भएको कार्यक्रममा प्रमुख अतिथि नेपाल प्रज्ञा प्रतिष्ठानका कुलपति भुपाल राईले पत्रकार साहलाई नगद २१ हजार १११ रुपैयाँसहित सम्मानित गरेका थिए ।
कार्यक्रममा साहित्यकार छवि अनित्यलाई रामहरि देवु युवा साहित्य सम्मान प्रदान गरिएको थियो । अधिवक्ता ऋषि केवी र उनकी पत्नी पुण्यशीला श्रेष्ठले स्थापना गरेको नगद १० हजार १ राशिको सो पुरस्कार अनित्यलाई प्रदान गरिएको थियो ।
हेटौंडामा शनिवारदेखि शुरू भएको दुई दिने साहित्य महोत्सवमा साह र श्रेष्ठसहित साहित्यकार मनु मञ्जिललाई डम्बर पूर्णमाया स्मृति कविता सम्मान, साहित्यकार महेश पौडेललाई साहित्य सङ्गम मकवानपुर कृति सम्मान, साहित्यकार पूर्णकला घिमिरेलाई शुभद्रादेवी मदन मुडभरी स्मृति सम्मान, साहित्यकार एसके निधनलाई मुक्तितारा सम्मान प्रदान गरिएको थियो ।
