चिरञ्जीवी सापकोटा, ठोरी, १४ असोज/
ठोरी गाउँपालिका–२ मा वनशक्ति युवा क्लबको आयोजनामा जारी दशैं कप नकआउट फूटबल प्रतियोगिता अन्तर्गत शुक्रवार दुईवटा क्वार्टरफाइनल खेल भए । पहिलो खेलमा आयोजक वनशक्ति युवा क्लब ‘बी’, ठोरी–२ ले मूनस्टार, ठोरी–३ लाई शून्यका विरुद्ध तीन गोलअन्तरले पराजित गरी सेमिफाइनलमा पुगेको छ । वनशक्तिका प्रशान्त लामाले दुई गोल र विवेक क्षत्रीले एक गोल गरेका थिए । यस खेलको ‘म्यान अफ दी म्याच’ वनशक्तिका प्रशान्त लामा घोषित
भए ।
दोस्रो खेलमा थ्रीस्टार युवा क्लब, ठोरी–१ ले प्रतिभा युवा क्लब, ठोरी–४ लाई शून्यका विरुद्ध दुई गोलअन्तरले पराजित गर्दै सेमिफाइनको यात्रा सुरक्षित ग¥यो । थ्रीस्टारका लागि दुवै गोल सुशील कुँवरले गरेका थिए । यस खेलको ‘म्यान अफ दी म्याच’ थ्रीस्टारका निखिल तामाङ घोषित भए ।
भोलि शनिवार पनि दुईवटा क्वार्टरफाइनल खेल हुनेछन् । पहिलो क्वार्टरफाइनल खेल तमु ब्वाइज युवा क्लब, ठोरी–१ र समाज जागरण युवा क्लब, ठोरी–३ बीच हुनेछ भने दोस्रो आयोजक वनशक्ति युवा क्लब ‘ए’, ठोरी–२ र सनराइज युवा क्लब, ठोरी–३ बीच हुने आयोजक समितिका कोषाध्यक्ष विशाल क्षत्रीले बताए ।
१६ वटा क्लबको सहभागिता रहेको फाइनल खेल असोज २१ गते हुनेछ भने विजेतालाई नगद रु ६० हजार, शिल्ड, मेडल तथा प्रमाणपत्र प्रदान गरिनेछ तथा उपविजेतालाई नगद रु ३० हजार, शिल्ड, मेडल एवं प्रमाणपत्र प्रदान गरिने पनि क्षत्रीले जानकारी दिए ।
