प्रस, वीरगंज, १९ भदौ।
गएराति बारामा डाँका र प्रहरीबीच दोहोरो झडप भएको छ । वीरगंज–पथलैया औद्योगिक क्षेत्रमा पर्ने जीतपुरसिमरा उपमहानगरपालिका वडा नं २३ एरोटेक प्रालिमा राति १२ः१० बजे लुटपाट गर्न आएको डाँकाहरूको समूहसँग प्रहरीको झडप भएको हो ।
उद्योगमा डाँकाहरू प्रवेश गरेको सूचना पाएपछि इलाका प्रहरी कार्यालय, जीतपुरका इन्चार्ज प्रहरी वरिष्ठ नायब निरीक्षक कलमबहादुर शाहीको कमान्डमा टोली पठाइएको थियो । प्रहरी घटनास्थल पुगेपछि प्रहरी र डाँकाबीच दोहोरो झडप भएको हो ।
झडपको क्रममा डाँकाहरूले एक राउन्ड र प्रहरीले तीन राउन्ड हवाई फायर गरेका थिए । हतियारसहित लुटपाट गर्न उद्योग छिरेका १०/१२ जना डाँकाहरूको समूहमध्ये एकजना डाँकाले फलामको रडले प्रवनानि शाहीको टाउकोमा प्रहार गर्दा उनी गम्भीर घाइते भए । उनको अहिले वीरगंज हेल्थकेयर अस्पतालमा उपचार भइरहेको छ ।
प्रहरीले डाँका समूहका दुईजनालाई नियन्त्रणमा लिन सफल भएको बाराका प्रहरी उपरीक्षक होबिन्द्र बोगटीले बताए । प्रहरीले नियन्त्रणमा लिएका अभियुक्तहरूको विस्तृत विवरण केही बेरमा पत्रकार सम्मेलन गरी जानकारी गराउने उनले बताए ।
प्रहरीले डाँकाहरूको साथबाट तीन थान गोलीसहित एक थान भरुवा बन्दुक र एक थान कटुवा पेस्तोलसहित दुई थान बन्दुक बरामद गरेको छ । डाँकाहरू स्थानीय चोरहरू रहेको र उनीहरू लुटपाट गर्न उद्योगमा गएको प्रहरीले जनाएको छ ।
