काबुल, २ भदौ/एपी
अफगानिस्तानको राजधानी काबुलको एउटा मस्जिदमा बुधवार साँझको प्रार्थनाको बेला बम विस्फोट हुँदा एकजना प्रमुख धर्मगुरुसहित कम्तीमा २० जनाको मृत्यु भएको छ भने अन्य ४० जना घाइते भएका छन् ।
एकजना प्रत्यक्षदर्शीका अनुसार विस्फोटमा मौलवी मुल्ला अमीर मोहम्मद काबुली मारिए भने धेरै बालबालिका घाइते भएका छन् । तालिबानले सत्ता कब्जा गरेको एक वर्षपछि धार्मिकस्थलमा भएको यो भीषण एवं जघन्य आक्रमणको जिम्मेवारी कसैले लिएको छैन ।
इस्लामिक स्टेट समूहको स्थानीय सहयोगीले तालिबान र सर्वसाधारणलाई लक्ष्यित गर्दै देशका विभिन्न भागमा आक्रमण बढाएका छन् । गत साता पनि उक्त समूहले एकजना प्रमुख तालिबानी धर्मगुरुको हत्या गरी त्यसको जिम्मेवारी पनि लिएको थियो ।
प्रत्यक्षदर्शीका अनुसार शहरको खेर खन्ना नजीक रहेको सिद्दिकिया मस्जिदलाई लक्षित गरी आत्मघाती विस्फोट गराइएको थियो । यहाँको इटालियन आपत्कालीन अस्पतालले बम विस्फोट भएको स्थानबाट पाँच बालबालिकासहित कम्तीमा २७ जना घाइते सर्वसाधारणलाई ल्याएको बताएको छ ।
काबुलका प्रहरी प्रमुखका लागि तालिबानद्वारा नियुक्त प्रवक्ता खालिद जाद्रानले मस्जिदभित्र भएको विस्फोटको पुष्टि गरे पनि हताहती र घाइतेहरूको विवरण उपलब्ध गराएका छैनन् । तालिबानी प्रवक्ता जबिहुल्लाह मुजाहिदले विस्फोटको निन्दा गर्दै यस्तो जघन्य अपराध गर्नेहरूलाई चाँडै न्यायको कठघरामा ल्याउने र सजाय दिने प्रतिबद्धता व्यक्त गरेका छन् ।
विस्फोटनका बेला मस्जिदमा रहेका एकजना प्रत्यक्षदर्शीले आज बिहान मृतकको सङ्ख्या अझै बढ्न सक्ने बताउँदै कम्तीमा २५ जना मारिएका एपीलाई जानकारी दिए ।
