प्रस, गरुडा, १७ असार/
रौतहटको गरुडा नपा–४ स्थित श्री माध्यमिक विद्यालयले विद्यालयको स्थापनाकालदेखिका प्रधानाध्यापकर विद्यालय व्यवस्थापन समितिका अध्यक्षहरूलाई सम्मानित गरेको छ ।
विद्यालयका प्रधानाध्यापक प्रभु राउत पटेलको अध्यक्षतामा भएको कार्यक्रममा नगरप्रमुख कन्थमणिप्रसाद कलवारले करीब एक दर्जन मानिसलाई सम्मानित गरेका थिए ।
विद्यालयको स्थापनाकालदेखिका प्रधानाध्यापकहरू अनुठा साह बनिया, हृदयनारायण साह, गन्देश्वरप्रसाद सिंह, हरिनारायण साहलाई सम्मानित गरिएको थियो ।
यसैगरी, स्थापनाकालदेखिका विव्यसका अध्यक्षहरू मेथुर चौधरी, रामप्रसाद साह, वंशीराम जयसवाल, भुवनेश्वरराम जयसवाल, रामकृष्ण चौधरी, चुनचुनप्रसाद साहलाई पनि सम्मानित गरिएको थियो ।
विद्यालयको इतिहासमा पहिलोपटक स्थापनाकालदेखिका प्रअ तथा अध्यक्षलाई सम्मानित गरिएको हो । केही प्रअ तथा विव्यसका अध्यक्षहरूको मृत्यु भइसकेकाले मरणोपरान्त सम्मानित गरिएको थियो । दिवङ्गत व्यक्तित्वहरूको सम्मानपत्र निजका प्रतिनिधिहरूलाई हस्तान्तरण गरिएको थियो ।
यसैगरी, विद्यालयले दुईजना जग्गादातालाई पनि सम्मानित गरेको छ । विद्यालयले गरुडा नपाका नवनिर्वाचित प्रमुख कन्थमणिप्रसाद कलवार, उपप्रमुख पूनमकुमारी चौधरी र वडाध्यक्ष सुनीलकुमार जयसवाललाई पनि सम्मानित गरेको थियो ।
सम्मान कार्यक्रममा नगरप्रमुख कलवारले जिल्लाको नमूना विद्यालयको रूपमा पहिचान बनाइरहेको सन्दर्भमा विद्यालयमा देखिएका समस्याहरूलाई समाधान गर्न आफूले सक्दो पहल गर्ने प्रतिबद्धता व्यक्त गरेका थिए ।
नगरप्रमुख कलवारले विद्यालयको चौतर्फी विकासमा सबैको साथ र सहयोगको आवश्यकता रहेको र नगरप्रमुखको हैसियतले विद्यालयको समस्या समाधान गर्न आफू चौबीसैं घण्टा तयार रहेको बताउँदै गुणस्तरीय शिक्षामा विद्यालयले पनि जोड दिनुपर्ने बताए ।
