बसको ठक्करबाट एकजनाको मृत्यु

प्रस, वीरगंज, ८ माघ/
तेजस एकेडेमीको बसको ठक्करबाट मङ्गलवार एकजना साइकलयात्रीको मृत्यु भएको छ । मृत्यु हुनेमा बाराको फेटा गाउँपालिका–५ का ४५ वर्षीय तैमुद्दीन मियाँँ रहेको प्रहरीले जनाएको छ ।

वीरगंज महानगर–१६ सडकखण्डमा तेजस एकेडेमीको ना.५ख १५०४ नम्बरको बसले साइकलयात्री मियाँँलाई ठक्कर दिंदा उनको घटनास्थलमैं मृत्यु भएको वडा प्रहरी कार्यालय, बिर्ताका प्रहरी निरीक्षक निरोज चौलागाईंले बताएका छन् ।

ठक्कर दिने बस र चालक देवा पासवानलाई नियन्त्रणमा लिएर अनुसन्धान भइरहेको प्रनि चौलागाईंले बताएका छन् ।