प्रस, वीरगंज, १५ पुस/
जिल्ला प्रहरी कार्यालय, पर्साले आइतवार १६० किलो गाँजासहित दुईजनालाई पक्राउ गरेको जनाएको छ । वीरगंज–१८ भवानीपुर सीताराम चोकस्थित प्लास्टिक कारखानाअगाडि सडकखण्डमा प्रहरी चौकी परवानीपुरले ड्राइपोर्ट आउँदै गरेको ना.३ख ४२१२ नम्बरको ट्रक चेकजाँच गर्ने क्रममा १६० किलो गाँजा बरामद भएको जिप्रका, पर्साका प्रवक्ता एवं प्रहरी नायब उपरीक्षक किशोर लम्सालले जानकारी गराएका छन् । ट्रकमाथि हुटमा फल्स बनाइ रातो प्लास्टिकमा बेरी लुकाइछिपाइ राखिएको १० किलोका १६ वटा पोकामा १६० किलो लागूऔषध गाँजा बरामद भएको प्रवक्ता लम्सालले बताए ।
प्रहरीले ट्रकचालक एवं धनी जिल्ला मकवानपुर हेटौंडा उमनपा–७ कमाने बस्ने ४४ वर्षीय कृष्ण घलान र चितवन जिल्ला झुरझुरे राप्ती नपा–३ बस्ने २० वर्षीय रोनाल विश्वकर्मालाई पक्राउ गरेको प्रवक्ता लम्सालले बताए ।
पक्राउ परेका दुवैजना व्यक्ति, लागूऔषध गाँजा र ट्रकलाई नियन्त्रणमा लिई आवश्यक अनुसन्धान भइरहेको प्रवक्ता लम्सालले जनाएका छन् ।
