प्रस, परवानीपुर, ६ पुस/
बारा जिल्लामा गएराति प्रहरीका भान्सेलाई गोली हानी हत्या गरिएको छ । सिमरा विमानस्थलमा रहेको अस्थायी प्रहरी चौकीमा भान्सेमा कार्यरत जीतपुरसिमरा उपमहानगरपालिका–१ सुकुमबासीटोल निवासी राजकुमार रूम्बालाई हिजो राति अन्दाजी साढे १० बजे वडा नं ११ आमाडार र रमौली जाने बाटोमा कारभित्रै गोली प्रहार गरी हत्या गरिएको थियो ।
चालकको सिटमा रहेका रूम्बा मृत भेटिएको र घटनाबारेमा थप कुरा बाहिर आउन सकेको छैन । बाग्मती प्रदेशको ०१–०२८ च ७६११ नम्बरको नेटा कम्पनीको इभी कारमा रूम्बा गोली लागेको अवस्थामा मृत फेला परेका थिए । उनलाई कारमा सवार व्यक्तिबाटै गोली प्रहार गरिएको बारा प्रहरीले प्रारम्भिक अनुसन्धानबाट पत्ता लगाए पनि कारमा सवार व्यक्तिहरूका बारेमा कुनै जानकारी प्राप्त नभएको प्रहरीले जनाएको छ । घटनाबारे थप अनुसन्धान जारी रहेको बारा प्रहरीले जनाएको छ ।
