प्रस, वीरगंज, ३० मङ्सिर/
१०औं राष्ट्रिय खेलकूद प्रतियोगिताको लागि पर्सामा पुस २७ गते पर्सा दौड प्रतियोगिता आयोजना हुँदैछ । कर्णाली प्रदेशमा १०औं राष्ट्रिय खेलकूद प्रतियोगिता आयोजना हुन गइरहेको र सोलाई मध्यनजर गर्दै एथलेटिक्स परिवार नेपाल, पर्साका अध्यक्ष शनिकुमार दुबेको अध्यक्षतामा शनिवार बसेको बैठकले १० किलोमिटर दौडको पर्सा दौड पुस २७ गते आयोजना गर्ने निर्णय गरेको हो ।
समितिका सचिव विशेश्वर पटेलले पुरुष तथा महिलाका लागि १० किलोमिटर खुला दौड प्रतियोगिता र विद्यार्थीहरूका लागि पाँच किलोमिटरको दौड प्रतियोगिता आयोजना गर्ने बताए । उनले १० किलोमिटरको दौडमा प्रथम हुनेलाई २५ हजार, द्वितीय हुनेलाई २० हजार र तृतीयलाई १५ हजार नगदबाट पुरस्कृत गरिने बताए ।
यसैगरी, पाँच किलोमिटरको विद्यार्थीहरूको दौड प्रतियोगितामा प्रथम हुनेलाई १५, द्वितीयलाई १० र तृतीयलाई पाँच हजार नगद पुरस्कार दिइने बताए । उनले प्रतियोगितामा १०औं स्थानसम्म हुने खेलाडीहरूलाई नगद, ट्रफी र प्रमाणपत्रको व्यवस्था गरिने जानकारी गराए । प्रतियोगिता घण्टाघरबाट शुरू हुने सचिव पटेलले जानकारी गराए ।
