प्रस, वीरगंज, २९ मङ्सिर/
काठमाडौं, पेप्सीकोलास्थित बालवाटिका स्कूलले शनिवार दोस्रो बिबिएस फेट–२०८१ कार्यक्रमको आयोजना गरेको छ । कार्यक्रममा विद्यार्थीहरूले आआफ्नो सृजनात्मकता प्रदर्शन गर्ने र नयाँ अनुभवहरू हासिल गर्ने अवसर पाएका थिए ।
काठमाडौं महानगरपालिकाका विद्यालय निरीक्षक ओमप्रसाद गौतमले उद्घाटन गरेको कार्यक्रममा विद्यार्थीहरूले विभिन्न रोचक स्टल, शैक्षिक प्रदर्शनी, सङ्गीत तथा नृत्य कला प्रस्तुत गरी मनोरञ्जन प्रदान गरेका थिए ।
कार्यक्रममा विद्यार्थीहरूले स्टल व्यवस्थापन, ग्राहक सेवा र व्यावसायिक ढाँचाको प्रत्यक्ष अनुभव प्राप्त गर्दै व्यवस्थापकीय सीपहरू अभिवृद्धि गर्ने अवसर प्राप्त गरेका थिए । विद्यालयका प्रधानाध्यापक रोशन सिंहले यस्ता अतिरिक्त क्रियाकलापले विद्यार्थीहरूको सर्वाङ्गीण विकास हुने विश्वास व्यक्त गरे ।
