प्रस, पोखरिया, ३ कात्तिक/
नवदुर्गा पूजा समिति पोखरियाको आयोजनामा जिल्ला उच्चाङ्गल मावि, पोखरियाको प्राङ्गणमा भइरहेको फूटबल प्रतियोगिता अन्तर्गत शनिवार भएको दोस्रो सेमिफाइनल खेलमा बिरुवागुठी युवा क्लबले चपुर युवा क्लब, रौतहटलाई पराजित गर्दै फाइनलमा प्रवेश गरेको छ ।
बिरुवागुठीले चपुरलाई शून्यका विरुद्ध तीन गोलअन्तरले पराजित गर्दै फाइनलमा प्रवेश गरेको हो । आज भएको खेलमा बिरुवागुठीका रुद्र पौडेलले दुई र अंशु चौधरीले एक गोल गरेका थिए । भोलि फाइनल खेलमा बिरुवागुठी युवा क्लब र वीरगंज युथ एकेडेमी भिड्ने आयोजक समितिका अब्दुल कलाम आलमले बताए ।
प्रतियोगिता अन्तर्गत हिजो भएको पहिलो सेमिफाइनल खेलमा वीरगंज युथ एकेडेमी ० का विरुद्ध एक गोल गरी फाइनलमा प्रवेश गरेको छ । वीरगंज युथ एकेडेमी र वीरगंज सिटी क्लबबीच भएको सो खेलमा खेलको १५औं मिनेटमैं युथ एकेडेमीले विजयी गोल गरेको थियो । गत असोज २८ गतेदेखि सञ्चालित प्रतियोगितामा आठवटा टीमले भाग लिएका छन् ।
