प्रस, वीरगंज, ३१ साउन/
भारतको ७८औं स्वतन्त्रता दिवस वीरगंजस्थित भारतीय महावाणिज्य दूतावास कार्यालयमा विविध कार्यक्रम गरी मनाइएको छ । दिवसको अवसरमा बिहीवार बिहान महावाणिज्यदूत देवी सहाय मीणाले भारतको राष्ट्रिय झन्डा झन्डोतोलन गरेका थिए ।
सो अवसरमा उनले भारतका राष्ट्रपति श्रीमती द्रौपदी मुर्मूले राष्ट्रको नाममा जारी गरेको सन्देश पढेर सुनाएका थिए । कार्यक्रममा वीरगंजका १३ वटा विद्यालय र कलेजका विद्यार्थीहरूले विविध सांस्कृतिक कार्यक्रम प्रदर्शन गरेका थिए । दिवसकै अवसर पारेर महावाणिज्य दूतावासले आशा किरण केन्द्रमा आयोजना गरेको चित्रकला प्रदर्शनीमा प्रथम, द्वितीय र तृतीय भएका विद्यार्थीलाई पुरस्कृत गरेको थियो ।
कार्यक्रममा प्रमुख जिल्ला अधिकारी दिनेशसागर भुसाल, प्रहरी उपरीक्षक कुमोध ढुङ्गेल, सशस्त्र प्रहरी उपरीक्षक राधेश्याम धिमाललगायतको सहभागिता थियो ।
यसैगरी, काठमाडौंस्थित भारतीय राजदूतावासमा आज भारतको ७८औं स्वतन्त्रता दिवस मनाइएको छ ।
सो अवसरमा नेपालका लागि भारतीय राजदूत नवीन श्रीवास्तवले भारतको राष्ट्रिय झन्डा झन्डोत्तोलन गरी समारोहको शुभारम्भ गरेका थिए । कार्यक्रममा भारतका राष्ट्रपति द्रौपदी मुर्मुले राष्ट्रका नाममा गरेको सम्बोधन भिडियोमार्पmत प्रस्तुत गरिएको थियोे ।
राष्ट्रपतिको उक्त सन्देशमा विगत ७७ वर्षमा विभिन्न क्षेत्रमा भएको प्रगतिमाथि प्रकाश पारिएको र भारतको स्वतन्त्रताका लागि आफ्नो जीवन बलिदान दिने स्वतन्त्रता सेनानीहरूलाई श्रद्धाञ्जलि अर्पण गरिएको थियो ।
कार्यक्रममा राजदूत श्रीवास्तवले भारतीय सशस्त्र बलका मृतक गोर्खा सैनिकका पत्नी र निकटतम नातेदारलाई रु पाँच करोड ५० लाख र कम्बल वितरण गरी सम्मान गरेका थिए । साथै भारतीय सशस्त्र बलका मृतक सैनिकका पत्नी एवं १०७ जना मृतक सैनिकका निकटतम नातेदारका लागि रु १२ करोड ५५ लाख भुक्तानी दिइएको थियो ।
सो भुक्तानीमा आर्मी ग्रुप इन्स्योरेन्स (एजिआई) कार्यक्रम अन्तर्गत सन् २०२४ का लागि ‘डेथ–इन–सर्भिस’, ‘एक्सटेन्डेड इन्स्योरेन्स’ र एजिआई परिपक्वता भुक्तानीलगायतका लाभहरू समावेश छन् ।
दूतावासले नेपालका पाँच प्रदेशका २१ शैक्षिक संस्था र पुस्तकालयका लागि पुस्तक अनुदानको पनि घोषणा गरेको छ । यस पहलले प्राप्त अनुरोधको प्रत्युत्तरमा दुर्गम क्षेत्रका विद्यार्थीका लागि शैक्षिक सामग्रीमा पहुँच बढाउने लक्ष्य राखेको छ ।
दूतावासका अधिकारी तथा उनीहरूका परिवारका अतिरिक्त नेपालमा रहेका भारतीय समुदायका सदस्य तथा शुभेच्छुकहरूको भारतको ७८औं स्वतन्त्रता दिवसको अवसरमा आयोजित कार्यक्रममा सहभागिता थियो । सो अवसरमा दूतावासको स्वामी विवेकानन्द सांस्कृतिक केन्द्र र केन्द्रीय विद्यालय, काठमाडौंका शिक्षक तथा विद्यार्थीले देशभक्ति गीत र नृत्य प्रस्तुत गरेका थिए ।
‘एक पेड माँ के नाम’ अभियान अन्तर्गत वृक्षारोपण
भारतीय दूतावास, लैनचौरमा आफ्ना आमाहरूको सम्मानमा सबैलाई वृक्षारोपण गर्न आग्रह गर्दै ‘एक पेड माँ के नाम’ अभियान अन्तर्गत वृक्षारोपण गरिएको छ ।
भारतीय प्रधानमन्त्री नरेन्द्र मोदीले विश्व वातावरण दिवस, २०२४ का अवसरमा ‘एक पेड माँ के नाम’ अभियान शुभारम्भ गरेका थिए । सो अभियानलाई भारतीय जनताको समर्थन र सहभागितासहित सफल कार्यक्रमका रूपमा भारतभरि लिइने गरेको छ ।
वन तथा वातावरण मन्त्री ऐनबहादुर शाही ठकुरीले आज लैनचौरस्थित दूतावास परिसरमा नीलो रड्ढो फूल फुल्ने गुलमोहरको बिरुवा रोपेर वातावरण संरक्षण एवं संवद्र्धन अभियानमा ऐक्यबद्धता जनाए । दुर्ई दिने नेपाल भ्रमणका क्रममा भारतीय विदेश सचिव विक्रम मिस्री पनि यही साउन २७ गते दूतावास परिसरमा नीलो फुल्ने गुलमोहरको बिरुवा रोपेर सो अभियानमा सरिक भएका थिए ।
वातावरण संरक्षण तथा वातावरणीय दिगोपन प्रवद्र्धन गर्न भारतीय ‘डायस्पोरा’का सदस्य एवं भारत–नेपाल मैत्री सङ्घका पदाधिकारी तथा प्रतिनिधिहरूले दूतावास परिसरमा बिरुवाहरू रोपी अभियानमा ऐक्यबद्धता व्यक्त गरेका थिए ।
‘एक पेड माँ के नाम’ पहलसँगै नेपालस्थित भारतीय दूतावास, लैनचौरले आज विभिन्न जातका ७८ वटा बिरुवा दूतावास परिसरमा रोप्दै भारतको ७८औं स्वतन्त्रता दिवस मनाएको छ ।
