प्रस, रौतहट, ३० साउन/
गौर नगरपालिकाको कोइरीटोलस्थित धानखेतमा एकजना वृद्ध व्यक्तिको धारिलो हतियार प्रहार गरी हत्या गरिएको छ ।
गौर नगरपालिका वडा नं ५ कोइरीटोलस्थित धानखेतमा सोही वडा निवासी ७४ वर्षीय अनिरुद्ध महतो कोइरीको धारिलो हतियार प्रहार गरेर हत्या गरिएको अवस्थामा स्थानीयले बुधवार बिहान देखेपछि प्रहरीलाई जानकारी गराएका थिए ।
प्रहरीले जानकारी पाउना साथ प्रहरी उपरीक्षक दिलीप घिमिरे, प्रहरी नायब उपरीक्षक एलिजा गिरीसहितको टोली घटनास्थलमा पुगेर अनुसन्धान शुरू गरेको जिल्ला प्रहरी कार्यालय, रौतहटले जनाएको छ ।
कोइरीटोलमा रहेको झोलुङ्गे पुलदेखि पश्चिमतर्फ धानखेतमा हत्या गरेर बेवारिसे अवस्थामा स्थानीयले वृद्धको शव फेला परेका थिए ।
आफ्नै खेतबारीमा तरकारी उत्पादन गरेर बिक्री वितरण गर्दै आएका कोइरीको पेटमा धारिलो हतियारले प्रहार गरी फालिएको अवस्थामा फेला परेको प्रहरीले जनाएको छ ।
हत्या भएको आशङ्का व्यक्त गर्दै आवश्यक अनुसन्धान गरिरहेका छांैं । चाँडै अभियुक्तलाई नियन्त्रणमा लिने दाबी प्रहरी उपरीक्षक घिमिरेले गरेका छन् ।
