प्रस, वीरगंज, २९ साउन/
ससुराको हत्या गरेको आरोपमा पर्सा प्रहरीले ज्वाइँलाई पक्राउ गरेको छ । वीरगंज महानगर–७ रामटोल बस्ने सीताराम सर्राफलाई निजका ज्वाइँ कलैया उपमहानगरपालिका–१ राजदेवी घर भई हाल वीरगंज–१० प्रगतिटोलमा डेरा गरी बस्ने ३१ वर्षीय साजन सर्राफले कुटपिट गरेका थिए । कुटपिटबाट घाइते ससुरा सीतारामको सोमवार नारायणी अस्पताल, वीरगंजमा निधन भएको थियो । निधन भएलगत्तै वडा प्रहरी कार्यालय, बिर्ताको टोलीले ज्वाइँ साजनलाई पक्राउ गरेको प्रहरीले जनाएको छ ।
घटना सम्बन्धमा आवश्यक अनुसन्धान भइरहेको प्रहरीले जनाएको छ । प्रारम्भिक अनुसन्धानमा ज्वाइँ साजनले ससुरा सीतारामलाई कुटेको बुझिन आएको र यसबारे ज्वाइँलाई पक्राउ गरेर अनुसन्धान शुरू गरेको पर्सा प्रहरीले जनाएको छ ।
