प्रस, रौतहट, १५ असार/
रौतहटको सखुअवा र जयनगरचोकको बीचमा यात्रुवाहक बस दुर्घटना हुँदा एकजना किशोरीको मृत्यु भएको छ भने १२ जना यात्रु घाइते भएका छन्।
गौरबाट वीरगंजतर्फ गइरहेको ना.७ख ८४१४ नम्बरको यात्रुवाहक बस गौर–चन्द्रपुर सडकखण्डको सखुअवा जयनगरचोकको बीचमा शनिवार बिहान अनियन्त्रित भई पल्टिंदा माधवनारायण नगरपालिका–३ भेल्हीका शैलेन्द्रकुमार गिरीकी १८ वर्षीया छोरी नेहाकुमारी गिरीको मृत्यु भएको जिल्ला प्रहरी कार्यालय, रौतहटले जनाएको छ।
दुर्घटनामा परेर १२ जना यात्रु घाइते भएकामा पाँचजनाको अवस्था गम्भीर रहेको जिल्ला प्रहरी कार्यालय, रौतहटले जनाएको छ।
गौर नपा–१ की रञ्जुदेवी दास, निजकी पाँच वर्षीया छोरी शिवानीकुमारी दास, तीन वर्षीया छोरी सुहानीकुमारी दास, सोही वडाकी मधुकुमारी दास, परोहा नपा–३ तेजापाकडका १६ वर्षीय देवंशकुमार दास, भारत मधुबनी बासोपटी गोगीटोल–३ का ४७ वर्षीय अभिनाश झा, निजकी पत्नी निकी झा, सोही स्थानकी ६५ वर्षीया सुधिरा झा, गौर नपा–४ का २६ वर्षीय राकेशप्रसाद चन्द्रवंशी, ६४ वर्षीय रामस्वरूप साह, रामदयाल साह, गौर नपा–७ का ४० वर्षीया मञ्जुदेवी साहको उपचार ग्रान्डी अस्पतालमा भइरहेको रौतहट प्रहरीका प्रवक्ता एवं प्रहरी नायब उपरीक्षक एलिजा गरीले बताइन््। बसचालक सहदेव चौधरीलाई इलाका प्रहरी कार्यालय, चन्द्रपुरले नियन्त्रणमा लिएको छ।
