प्रस, वीरगंज, २५ जेठ/
पर्सा जिल्ला लिग फूटबल प्रतियोगिताको फाइनलमा भेट्रान्स सिटी क्लब, वीरगंज र युनिटी क्लब, वीरगंज पुगेका छन्।
बिहीवार भएका दुई सेमिफाइनल खेलमध्ये पहिलो सेमिफाइनलमा भेट्रान्स सिटीले पर्सा फूटबल क्लबलाई शून्यका विरुद्ध एक गोलअन्तरले पराजित गरी फाइनलमा पुगेको थियो। भेट्रान्स सिटीका इमाम हुसेन अन्सारीले खेल शुरू भएको २५औं मिनेटमा गरेको गोल पहिलो सेमिफाइनल खेलको निर्णायक साबित भयो।
यसैगरी, दोस्रो सेमिफाइनल खेलमा युनिटी क्लब, वीरगंजले विशाल मेमोरियल फाउन्डेशनलाई एकका विरुद्ध दुई गोलअन्तरले पराजित गर्दै फाइनलमा पुगेको हो। खेल शुरू भएको २९औं मिनेटमा विशाल फाउन्डेशनका राहुल ओझैयाले एक गोल गरेका थिए भने त्यसपछि युनिटीका ससन लामिछानेले ५६औं मिनेटमा र अनिल पटेलले ७०औं मिनेटमा एक/एक गोल गरेका थिए। प्रतियोगिताको फाइनल खेल शनिवार हुने पङ्कज श्रेष्ठले बताएका छन्।
